Ha ka por synshar ki Phareng watla ki khlaiñbor ki khlem lah pynduh dustur jong ngi : Dy. CEM

Shillong, Naitung 05 : Ka Khasi Hills Autonomous District Council (KHADC) hynne ka sngi ka la lum ïa ki Khlieh Nongsynshar bad ruh ïa ki sengbhalang bapher bapher ban ïatai halor ka jingthmu pyntreikam ïa ka UCC (Uniform Civil Code) ha baroh kawei ka ri.
Ha kane ka jingïalang la donlang naduh u CEM, Deputy CEM, Chairman, ki Executive Member bad ruh ki MDC nalor ki Syiem, ki Nongïalam Shnong bad ki Sengbhalang ba paw jong ka jylla.
Haba kren bad ki lad pathai khubor hadien ka jingïalang, u Deputy CEM, Bah Pynshngaiñ N Syiem u la ïathuh ba naduh ka por ba synshar ki Dohlieh ki khlem lah satia ban pynduh ïa ka bor bad ka riti dustur kaba kum ka Jaidbynriew ka don. Kumta u la ong ba mynta ruh ki donkam ka jingïa tylli lang kawei ka buit kawei ka bor ban pyrshah lang ïa katei ka aiñ rew.
“Kane kaba ngi ïa kren kan rung lut ha ka jingthoh kaba ngin phah sha ka National Law Comission jong ka Ri,” u la ong da kaba bynrap ba lada ki phah tang khyndiat ka Law Ministry kan ym da patiaw than hynrei haba ki la phah kattei ki jingai jingmut lehse ka Commission kan pynsngap.
Shuh shuh u ong ruh ba namar ki don lut ïa ki dulir ba ka Jaidbynriew ka ïasoi ban pynïasoh sha ka India, kumta ki hap ban ïa shong pyrkhat ban ïakren lada jia ba katei ka sienjam kam seisoh.
Nalorkata, u ong ruh ba kin sa don ruh ka jingïalang bad ki lai tylli ki District Council jong ka jylla ban kyrpad ïa ka sorkar jylla ban don lang kajuh ka rukom pyrkhat ban ym shah ïa kine ki kam leh donbor.
Na ka liang u President ka KSU, Bah Lambokstarwell Marngar ha ka jingkren jong u, u la ong ba ki sngewkmen ban ïoh ïathir ïatai lang ryngkat bad ka Council halor katei ka phang ha shwa ba yn phah sha ka Commission.
“Ngi ïohi ka jingkren jong u Myntri Rangbah bad kumta ngi kyrmen ba baroh 60 ngut ki MLA ki shim lang ïa kajuh ka sur ban ïada bad pynneh pynsah namar lada kim shim rai rangbah ki rai na Delhi kin long ki jingiuhroit ïa ka riti dustur jongngi,” u la ong.
U President ka HNYF, Bah Sadon Blah pat u la ong, “Ngi pyrshah ïa ka UCC hynrei ngi kwah pat ban ïohi ba ka District Council kan ym lum tang lai tylli hynrei ïa baroh 10 tylli ki Council ha ka thaiñ shatei lam-mihngi jong ka Ri ban ieng pyrshah.”
U President ka FKJGP, Bah Dundee Cliff Khongsit u la ong, “Kum ka Jaidbynriew ngin ieng pyrshah jur ïa ki bor kiba ktah ïa ka riti dustur jongngi bad ngi donkam ruh kawei ka sur ban phah sha ka sorkar India.”
U President ka HYC, Bah Robertjune Kharjahrin u la ong ba ka UCC ka thew beit ïa ka jingbujli noh ïa ki riti dustur bad pynduh noh ruh haduh kumba 60 persen ïa ka Khyrnit kaba Hynriew. U ong ruh ba donkam ban tylli lang baroh ban pyrshah jur ïa kane ka UCC.
Na ka liang u Nongïalam jong ka Synjuk ki Nongsynshar Shnong ka Bri u Hynñiewtrep, Bah RL Blah u la ong, “Ngin ïeng tylli naka liang ki Rangbah Shnong ban kyrshan 100 na ka 100 ïa ka KHADC ban ïaid shakhmat.”
U la ong ruh ba ki shim ka rai ba nalor kaei kaba ka KHADC ka pynkhreh, kin ai lang ruh ka jingai jingmut bad ka shong pat ha ka Council kumno ban pynkhlaiñ ïa ka nongrim ba ka ïeng.
Nalorkata, u ong ruh ba ha India kim tip satia ïa ki District Council namar ki don tang 10 tylli kata ruh tang ha ka thaiñ shatei lam-mihngi jong ka Ri. “Kumta, ngi kyrpad ïa ka KHADC ba kan long ka nonglam lynti bad tbeh sharak nakhmat ban lum lang ïa ki district council baroh ban pyrshah ïa ka jingthmu jong ka sorkar pdeng halor ka UCC.”
Shuh shuh u ong ruh ba kane kadei ka por ba dei ban klet shwa ïa kiei kiei hynrei ban buh ïa ka Jaidbynriew hakhmat.
U President jong ka Federation of Khasi States, Paiem KM Syiem u la ong ba kin ïeng ban ïaleh pyrshah ban pyllait bad pynim ïa ki khun ki hajar ka Bri u Hynñiewtrep.
“Ki Khasi State ki ïoh laitluid por synshar ki dohlieh hynrei ha ka jingpynbeit bad ka sorkar India ki pynïasoh da ka jingkular ban pynneh pynsah ïa ka riti dustur ba ka Jaidbynriew ka ju leh,” u la ong da kaba bynrap pat ba lada wan ka UCC kine baroh kin duh noh bad dei na kata ka daw ki pyrshah jur.