Mawkyrwat, Naitung 07: Ka South West Khasi Hills District Badminton Association ryngkat ka jingïatreilang bad ka ophis u District Sports Officer, South West Khasi Hills District mynta ka sngi ka la ïoh ban plie pyrda ïa ka lympung ïalehkai badminton kaba la tip kum ka ‘9th South West Khasi Hills District Badminton Championship 2023’ (SWKHDBC) hapoh ka Mawkyrwat Indoor Stadium, South West Khasi Hills District.
Ïa kane ka ‘9th South West Khasi Hills District Badminton Championship 2023’ la wan ban plie pyrda da u bah Pius Marweiñ, MLA ka Ranikor Constituency u la long kum u kongsan ha kaba haduh 101 ngut ei ei ki nongïashimbynta ba kynthup naduh ki hep rit, ki samla, ki rangbah bad kumjuh ruh ki longkmie kiba na kylleng ki shnong hapoh jong ka South West Khasi Hills District.
U bah Pius Marweiñ, MLA ka Ranikor Constituency haba kren kum u kongsan u la pynpaw ka jingaikhublei na ka bynta kane ka association kaba la pynlong ïa kum kane ka lympumg ïalehkai kaba long kumshibynta ba ki khynnah rit, ki samla bad kiba la heh la san kin ïoh ban ïa kilanmet khnang ba kin ïoh ka met kaba koit ba khiah. Ha kajuh ka por u la ong ruh ba ki jingïalehkai ha kine ki sngi kim long shuh tang ki jingpynbyrngia ïa ki shimet ne ïa ki nongpeit kai hynrei ka la long kawei na ki bynta ban ai kam ai jam na ka bynta kito kiba nang ban pyndonkam hok ïa ka sap kaba U Blei U la ai ha ki.
Namarkata, u la aimynsiem ïa ki ‘rang bad ki ‘thei ïalehkai ba kim dei shu ïalehkai ban pynlut kai ïa ka por khlem da don ki jingthmu kiba khamjngi hynrei ki dei ban buh ha ki ïa thong ban poi sha kiwei pat ki kyrdan kata ban kiew na ka distrik sha ka state bad kumjuh ruh wat ha ka National Level.
Haba kren ai mynsiem na ka bynta ki nongïalehkai, u bah Pius Marweiñ u la ong ba ha ka jingïalehkai kin sa don beit kiba jop bad kiba rem, kumta kiba jop kim dei ban don noh ha ki ïa ka mynsiem jingsngewsarong namar ïoh kin shah rem ha kawei ka sngi bad kiba shah rem ruh kim dei ban duh jingkyrmen hynrei ki dei ban don ha ki ïa ka mynsiem jong ka jinglen-lade da kaba trei shitom ha ki sngi ki ban sa wan.
Kiba iadonlang ha kane ka sngi ki long ka kong Y.R. Mawlong, MCS, Additional Deputy Commissioner, South West Khasi Hills District, u bah R.R. Lyngkhoi, Myntri Shnong Sohkhyllam lem bad kiwei de ki riew rangbah.
Lah ban kdew ba ïa kane ka lympung ïalehkai badminton la plie pyrda mynta ka sngi ka 7 tarik u ‘Naitung, 2023 bad ban sa pynkut ha ka 11 tarik ‘Naitung, 2023.
Ïa ka jingïalang ha kane ka sngi la pynïaid da u bah H.S. Diengdoh, President jong ka South West Khasi Hills District Badminton Association bad ka kong Nemoralda Nongrum, Treasure jong ka South West Khasi Hills District Badminton Association kaba la ai ki kyntien khublei.
