Ym pat don ba kam sa ka met jong uwei napdeng ki saw ngut ba shah pynïap ha Umpleng

Khliehriat, Naitung, 09: Ha kaba ïadei bad ka jingjia ba shah pyniap dusmon ki saw ngut ki briew ha kaba ïa ki met iap la lap na Umpleng East Jaiñtia Hills District myn ha ka 6 tarik mynta u bnai naitung, ki khubor pulit ki iathuh ba ka dang don sa kawei ka met iap kaba haduh mynta ym pat don ba wan ban kam trai, ïa kane ki met ki pulit ki la buh ha ka jaka buh met iap ha Khliehriat Civil hospital naduh ka sngi ba la lap ïa ki.
Ïa ki met jong ki lai ngut kiba shah pyniap dusmon kiba la tip kyrteng kum u (L) Ravi Rai, 23 snem kyrta uba na ka shnong Pastha Elam, Nepal, u (L) Nasar Kyndait, 33 snem kyrta uba na ka shnong Dkhiah East Pohshnong, East Jaiñtia Hills District bad u (L) Rajesh rai, 23 snem kyrta, uba na ka shnong Dharan Sunsari, Koshi Anchal, Nepal ki pulit ki la aiti noh sha kiba haïing hadien ba la wan ban kam da kiba ha ïing, katba ïa kawei pat ka met iap ym pat shym la don ban wan kam trai haduh mynta.
Halor katei ka jingjia shah pyniap, ki pulit East Jaiñtia Hills District ki la register ejahar ha Khliehriat Police Station bad ka jingtohkit halor kane ka dang ïaid shakhmat.
Kum ban shu phai dien, ki pulit East Jaiñtia Hills District myn ha ka 6 tarik ki la leit ban shimti ïa ki saw tylli ki met iap kiba la shah pyniap dusmon bad ïa ki met jong ki la lap na Umpleng, kumba paw, ïa ki met jong ki saw ngut la teh la khum lang ïa ki na ki kti da u tyllai bad la pom dusmon ruh ïa ka met jong ki da ki tiar ba nep na ki bynta ka khlieh bad ryndang bad lah ban ong ba la long ka jingshah pyniap kaba ishyrkhei haduh katta katta, ïa ka met jong ki la lap da ki briew kiba na ka thaiñ Umleng ha ka step jong ka 6 tarik bad ki la pyntip sha ki bor pulit bad ki pulit ha ryngkat ka kynhun CSU, Mobile forensic Crime scene unit bad Megistrate ki la leit sha katei ka jaka ban bishar bniah bad hadien ka jinglum ïa ki sakhi satar la pynkynriah noh ïa kine ki metiap shapoh Civil Hospital Khliehriat ban leh ïa ka post mortem.
Nalor kata la ong ruh ba namar kane ka rukom shah pyniap dusmon jong ki sawngut na ka liang ka tnad pulit ka la thaw da ka Special Investigation Team (SIT) ban iarap lem ïa u I/O ban pynlong ka jingtohkit halor kane ka jingjia.