Nongpoh, Naitung, 09: Ka National Institution for Transforming India (NITI) Aayog, ka la plie paidbah noh mynta ka sngi ïa ka thong jong ka Sampoornata Abhiyan ha Parish Hall, Nongpoh ba hap hapoh ka Umling Block, kum shi bynta ban shim ïa ki lad ki lynti ban jop halor ka thong jong katei ka Sampoornata Abhiyan.
Kane ka dei jingïalap kaba kyrpang ban poi sha ka thong bad kaba dei ruh ka jingangnud ban pyndep ïa kita ki 12 tylli ki mat treikam (Indicators) ha ki 500 tylli ki Block ba hap ha ki 112 tylli ki Aspirational District hapoh ka ri.
Kane ka jingplie kane ka Sampoornata Abhiyan la wan ban shim bynta naduh u Surender Mehra, Adviser NITI Aayog, u Bah Mayralborn Syiem, MLA ka Nongpoh, u Bah Sosthenes Sohtun, MLA ka Jirang, u Bah Damanbait Lamare, MLA ka Umroi, u Abhilash Baranwal, Deputy Commissioner ka Ri Bhoi, ki ophisar sorkar bad ruh ki paidbah nongshong shnong ka RI Bhoi.
Lyngba ka jingplie ïa kane ka Sampoornata Abhiyan, la pynlong ruh naduh ka jingïamareh Marathon, ka jingïakop dro dur, ka iew ïa pyninam, bad kiwei kiwei bad la sam ruh ïa ki khusnam sha kito ki nongjop bad sha kito ki nongioh bynta lyngba ka thong jong katei ka Sampoornata Abhiyan.
Kane ka jingïalap paidbah ka dei halor ka thong jong ka sorkar India kum kita ki Aspirational District kiba hap ban ban khia halor ka koit ka khiah, ka rep ka riang, ka pule ka puthi bad kiwei kiwei kam kiba ai jingmyntoi ïa ki paidbah.
U Surender Mehra, Adviser NITI Aayog, u la ai jingkren ha kane ka sngi bad la pynshai ruh halor ka thong ka jong ka NITI Aayog, lyngba ka Sampoornata Abhiyan na ka bynta ki Aspirational District, ba ki hap ban bankhia halor ka thong ban poi sha ka jingjop. Kane ka jingplie paidbah ïa kane ka Sampoornata Abhiyan ha Umling Block ka dei kaba ka sorkar ka buh thong ba halor ki 6 tylli ki mat ba la buh ban pyndep, dei ban trei shitom ban pyndep tang hapoh u lai bnai, ba ki kam pynroi ki dei ban poi sha kito kiba dei hok ban ioh.
U Deputy Commissioner ka Ri Bhoi, u Abhilash Baranwal, haba kren halor ka thong jong ka Sampoornata Abhiyan, u la ong ba kum ki paidbah ki dei ban ïatrei lang na ka bynta ban pynthikna ba ki khylling kim dei ban shah ktah na ka jingpang bapher bapher bad dei ruh ban pynthikna ïa ki lad ai jingïada ba la buh da ka sorkar.
“Ka thong ka long ruh ban sam ïa kita ki Health Soil Card sha ki nongrep ka District bad kumba 2400 ki nongrep kim pat ioh pdiang ïa kane ka health soil card.
Shuh shuh, u la bynrap ruh da kaba ong, ban pynurlong ïa ka thong jong ka Sampoornata Abhiyan, la donkam ban don ka jingïatrei lang na baroh ki liang bad ngi dei ruh ban poi 100 % ban pyndep ïa kane ka thong, kaban ai jingmyntoi ïa ki paidbah bad ruh ban wan ka jingkylla ha ka liang ka roi ka par ha ka jylla bad ka ri hi baroh kawei, u la bynrap.
Na ka liang ki nongmihkhmat ka Ri Bhoi ba kynthup naduh u Bah Mayral Born Syiem, u Bah Sosthenes Sohtun,u Bah Damanbait Lamare, ki la ai jingïaroh ïa ka NITI Aayog bad dei lyngba kane ka shnat treikam ka sorkar kmie la wan rah ïa kata ka thong kumno ban saindur na ka bynta ka jingkylla bad ka roi ka par hi baroh kawei ban jop kumba la buh thong da ka sorkar.
Lyngba jong kane ka sngi, la sam ruh ïa ka cheque kaba 2.7 lak, ba la ai sngewbha da ka Byrnihat Industrial Association, na ka bynta ban pynpoi bording ïa ka shlem treikam jong ka Seiborlang SSC Umshaken bad ruh la sam ïa ki khusnam ai mynsiem sha ki 5 ngut ki nongioh jingmyntoi lyngba ka Soil Health Cards bad ruh na ka bynta ki jingbam ba teimet sha ki 5 ngut ki Longkmie ba armet.
