Bun ki shnong ha rilum Jaiñtia kiba pyrshah jur ïa ka Draft jong ka Delimitation Committee ka JHADC

Jowai, Naitung, 09: Ka Delimitation Committee jong ka Jaiñtia Hills Autonomous District Council kaba la long ha ka sngi Baar ban pyn-sngew paidbah (Public Hearing) ïa ka Draft Delimi-tation ïa ki Consti-tuency ne ka jingphiah ïa ki Consti-tuency ka JHADC, shi bynta na ka MDC Election.
Kane ka Public Hearing jong ka Delimitation Committee ha ka sien kaba ar la pynlong mynta ka sngi ba ar ha District Library Auditorium Mynthong, Jowai na ka bynta ki 16 tylli ki Constituency kiba kynthup ïa ka Amwi-Khliehtyrshi, Mukhla-Ummulong, Moodymmai-Nongkhroh, Wahiajer-Kyndong, Moodop-Umladang, Mynso-Nongjngi, Mynsngat-Khanduli, Shilliang myntang-Namdong, Barato-Mukroh, Mootyrshiah-Saphai, Sahsniang-Mowkaiaw, Raliang, Shangpung, Jowai-North, Jowai-Central bad ka Jowai South Constituency.
Na ka liang kiba nongïalam shnong kiba hap hapoh kitei ki Constituency ki la wan poi khnang khnnag sha kane ka jingïalang ban pynsngew ïa ki jingmut jong ki sha ka Delimitation Committee kaba dei ka kynhun shimet (Indepen dence) ka ban pynbeit bniah ïa ka Draft Delimitation jong ki Constituency.
Ha kane ka jingpyn-sngew kiba bun hi na ki Nongïalam Shnong hapoh kitei ki Constituency ki la pyrshah jur ïa kane ka Draft Delimitation ba thymmai. Hynrei ki don ruh katto katne tylli ki shnong kiba mynjur ïa kane ka jingphiah Constituency.
Kiba bun napdeng kitei ki Constituency ki la pynpaw ka jingpyrshah jur ïa ka Delimitation Committee ka JHADC kaba la pynbeit ïa ki Constituency thymmai khlem da kynjoh ktien shwa ïa ki nongïalam shnong halor ka jinglong jingman jong ki shnong ki thaw, namar kane ki don ruh ki shnong kiba pynhap jubor sha kiwei pat ki shnong bad kane ka la buh jingeh ïa ki ban leit thep vote ha ka lynti kaba jngai.
La don ruh kiba pynsngew kane ka jingphiah thymmai ïa ki Constituency kam ïahap satia bad ka kyrteng jong kitei ki shnong, lada kumne la donkam ban pynkylla kyrteng noh ïa ki Constituency namar ka paw beit ïa ka rukom buh kyrteng ïa ki Constituency.
Kiba buh hi ki nongkren ha kane ka sngi ki la pynsngew kaba biang eh dei ban leh katkum ki Constituency kiba rim, hynrei lada ym lah ban pynbeit ïa kane ki la kren shai ba kin sangeh syndon ïa ka jingleit thep Vote bad ki don ruh ki nongïalam shnong kiba ong kim banse ban pynlong noh da ki jingïakhih ba jur bad ban kiew shaduh ka ïing lieh ïing saw.
Na ka liang ka Delimitation Committee ka la ai por ïa ki paidbah ba kin phah da ka jingthoh jingujor sha ka Committee bad ïa ki jingthoh yn pdiang haduh ka 3 baje janmiet jong ka 19 tarik mynta u bnai Naitung 2024.
La pynkut ïa kane ka jingpynsngew padibah da ka jingkren ai khublei na u bah P. Shylla, uba dei u Secretary jong ka Delimitation Committee JHADC.
Na ka liang ka Committee kan nang ïai bteng ïa kane ka jingpyn sngew paidbah sa ha ka 11 tarik Naitung 2024 ka ban long ha Khliehriat West Comminity Hall, East Jaiñtia Hills District, na ka bynta ka Muthlong-Sohkymphor, Tuber, Musniang-Rangad, Rymbai-Khliehriat, Sutnga-Narwan, Sutnga-Nong-khlieh, Sumer, Saipung-Nongkhlieh, Narpuh bad ka Bataw-Lakadong Constituency.