Shillong, Lber 29: Ka Shillong Press Club (SPC) kala ther ïa u President ka VPP bad MLA ka Nongkrem u Bah Ardent Miller Basaïawmoit halor ka jingkynthoh kaba pynjahburom ïa ka burom ka ijot jong ki Nongthoh khubor ka Jylla khamtam kiba don ha Ri-lum Khasi Jaiñtia.
“U Bah Basaïawmoit ula shu kynthoh pathar khlem ki nongrim bad ki sakhi kiba biang kiba ktah ïa ka jingtrei hok jong baroh ki Working Journalist kiba la kitkhia ïa ka kam wat hapdeng ki jingeh, ki jingduna bad ki jingtynjuh bad kila pyrshang katba lah ban trei ïa ka kam thoh khubor ban kyrshan ïa ka jinglaitluid ban kren bad pynpaw kumba la pruid dak da ka Riti Synshar ka Ri,” ong u Bah David Laitphlang, President ka SPC ha ka kyrwoh.
U Bah David ula ong ba kane kam dei ka sien kaba nyngkong ba u Ardent ula kren tohmet ïa kaba u tip kham bha ma u ïa ki daw, ïa kino kino ki briew kiba pynpaw ïa ka jing bym sngew ïahab bad ka pyrkhat, ka pyrdaiñ, ka jinglong bad ka jingkren jong u.
“Ka Shillong Press Club ka pynrem ïa kane ka jingleh riewkhlaw jong une u briew ïa uba ngi ngeit ba u dei uba don ka kyrdan ha ka imlang sahlang. Namar kata, kan bha shibun eh ïa u ban shu ‘boycott’ ïa ki lad pathai khubor khnang ba un nym buh ïalade bad ïa ka Party VPP ha ka jinglong jingman ka bym sngewtynnad ha ka jingpyrshang ban shakri ia ka bha ka miat ki paidbah ka Meghalaya,” ong u Bah David.
“Ban dawa panmab na kum une u riewstad kan dei tang ka jingpynsyrwa kai ïa ka por bad ka pyrkhat pyrdaiñ bad kumta, ka Shillong Press Club ka ieh ha ka jingstad jong ki nongpule bad ki nongpeit khubor ba kin rai mano, mynno, kumno bad hangno ba ngi ki leh ïa kaba bakla,” ula ong.
“Ban pynrem ïa kaei kaba tei ka dei kaba ngi pdiang sngewbha namar ka ïarap ïa baroh ban pynbha ïalade, hynrei ban shu hylla da ka jingsngewskhem halor ki kam ba um tip, ka dei ka lynti kaba bakla ban shakri ïa ki para briew. Haba kut, ngi hap kynmaw ba ngim dei ban bishar bym hok ïano ïano ruh, namar baroh ngin sa shah bishar ha kawei ka sngi,” ula bynrap.
