Shillong, Lber, 29: Ki shipai BSF jong ka 172 Battalion, Meghalaya kiba la pynlong ka jingpynap shrip ki la ïohbat ïa kawei ka kali kaba kit ïa ka shini ba la thmu ban khaii beaiñ sha ka ri Bangladesh bad kem ruh arngut ki nong India na khappud Kuliang kaba hap hapoh ka East Jaiñtia Hills District.
Lyngba ka jingïoh jingtip kaba bniah, ki shipai BSF ki la ïohbat ïa ka kali kaba kit hduh 35,000 kilor ka shini katba ka dang wan na ka thaiñ Ladrymbai ban leit sha ka shnong Kuliang.
Ha ka jingtohkit, u nongñiah bad u nongbud kim shym la lah satia ban pyni ïa kino kino ki dulir halor ka jingkit ïa ka shini.
Ïa ka kali, ka shini bad kynthup ïa ki arngut kiba la shah kem la aiti noh sha tnat Custom ban leh ïa kaba donkam katkum ki kyndon jong ka aiñ.
