Shillong, Risaw 24 : Ki shynrang Khasi kiba ïoh tnga da ki kynthei kiba dei na ka Jaidbynriew riewlum ha ka tangjait, ki la lah ban ai beit da kano kano ka jait kaba ki sngewbit khlem da donkam shuh ban thoh na khmat ia ka kyntien, “KHAR” kumba ju long baroh shikatta ha ka tangjait.
Kane ka long hadien ba ka Khasi Hills Autonomous District Council ka la wanrah ïa ka jingpynbeit thymmai ha ka Khasi Hills Autonomous (Khasi Social Custom of Lineage) Amement Bill, 2023 kaba la ïoh dang shen ïa ka jingmynjur na u Lat ka Jylla Meghalaya ban pynlong ain ïa kane ka ain-rew.
Ha ka jingïakren bad ki lad pathai khubor ha kane ka sngi Palei, u Chief Executive Member ka KHADC, Bah Pynïaid Sing Syiem u la ïathuh ba lyngba kane ka ain la pynrung ruh ïa ka Clan Administration ban ithuh ïa ki Kur ki Jait kiba don kumba 3 hajar tylli hapoh ka ri Khasi.
U la ïathuh ruh ba katkum ka kyndon hapoh jong kane ka ain, nangne shakhmat baroh ki Seng Kur ne ki Kur bapher bapher kiba don hapoh ka ri Khasi kin hap ban rejistar hapoh ka ophis jong ka Khasi Hills Autonomous District Council bad ha kajuh ka por, ïa ki nongkitkam jong ki Seng Kur dei ban phah sha ka District Council ban buh rekod.
“Ki kur ki hap ban wan rejistar sha KHADC bad ki hap ban don ïa ki rukom treikam, ïa ki komiti ban wan soi ïa ka rai ba ïano ki jied nongkitkam bad kito kiba ki la jied kin phah da ka letter head jong ka Kur sha ka KHADC ban ïoh ïa ka jingithuh,” ong u CEM.
“Kumba long mynta ngi dang don sa kawei ka jingwad bniah kaba dang sahteng kaba la jan dep artad kaba ïadei bad ka Kur ka Jait Khasi kiba don kumba 3000 tylli ei ei. Ynda la dep kane ka jingwad bniah kan sa kham shai shuh shuh halor ki Kur Khasi kiba don ha kane ka ri jongngi,” u la bynrap shuh shuh.
U CEM u ong ruh ba katkum ka Principal Act, ba haba ïadei bad ki Kur kin sa mih ruh ki jingai Kur thymmai. “Hangne kein na ki Deputy Commissioner kin ym lah ban ai Schedule Tribe ïa kino kino ki Kur thymmai khlem da ïoh shwa ka jingmynjur na ka Council,” bynrap biang u CEM.
U ong ruh ba ha kawei ka liang ka long kumba buh rekod bad ha kajuh ka por ban khanglad ïa ki briew kiba pyndonkam bakla ïa ka Kur ka Jait Khasi.
Katba na ka liang u Deputy CEM, Bah Pynshngaiñ N Syiem pat haba bynrap lang u la ong ba kino kino kiba ïoh ïa ki kynthei bym dei Khasi ki ju ai Dkhar ne Khar ha ka tangjait. “Hynrei haba ïa kynduh ïa ki rangbah kiba ïa poikha bad ki Mizo ne ki Naga ki ong kumno yn ai Khar na khmat. Te mynta ïa kane la pynthymmai ïa ka ba nangne shakhmat ym donkam shuh ban ai Khar na khmat hynrei ai da ka ktien Khasi paka,” u la ong.
Shuh shuh u ong ruh ba kito kiba tang jait lada ki dei ki riewlum ki lah ban ai Khar na khmat ruh kam lei lei bad lada kim ai ruh kam lei lei.
