Shillong, Risaw 24 : Da ka jingmynjur jong u Lat ïa ka Khasi Hills Autonomous District (Administration of Elaka) (Amendment) Bill, 2023, kane ka aiñ ka la pynkupbor ruh ïa ki Seng Samla kumjuh ki Seng Longkmie ba kin don bynta lang na ka bynta ban pynkhlaiñ ïa ka jingtreikam jong ki Dorbar Shnong.
Haba kren bad ki lad pathai khubor, na ka liang u CEM ka KHADC Bah Pynïaid Sing Syiem kumjuh u Deputy CEM Bah PN Syiem ki la ong ruh ba lyngba kane ka aiñ ki shnong ki thaw ki lah ruh ban ïakhun ïa ka rung ka mih jong ki briew kiba nabar sha kane ka jylla nalor ba ki hap ruh ban rejistar ïalade ha kito ki Dorbar Shnong ba ki leit ban sah.
“Da la treikam kane ka aiñ, ki paidbah kiba wan na kylleng lada ki wan ban sah sha u pud u sam jong ka KHADC lane ha kino kino ki shnong bad ki dong ki lah ban sah wai ha kato ka jaka hynrei ki hap pat ban da pyntip bad rejistar bad ki bor ba dei peit,” ong u CEM.
Nalorkata, u ong ruh ba kane ka aiñ kan ïarap ruh ïa ka jingïakhun pyrshah ïa ka jingjyllei u drok kaba la kiew bha ha Meghalaya.
La ong ruh ba kane ka Aiñ ka kdew ba kino kino kiba wan sha ki shnong ki dong ki dei ban rejistar kam pher la ki dei ki Khasi kiba wan na kiwei ki distrik hynrei ki dei beit ban rejistar kum ki nongwan shongwai.
“Ki bym dei Khasi ruh ki hap ban rejistar. Kane hi kan ïarap ban buh rekod ïa ka rung ka mih bad ïa ki briew kiba wan shongwai ha ki shnong ki thaw. Ha kajuh ka por kan ïarap ruh ïa ki bor distrik bad ki bor ka aiñ lada ki kwah ïa kine ki rekod hadien habud,” ong u CEM.
Katba na ka liang u Deputy CEM pat u la ong ba mynta ha kane ka ain kan don ruh ka Vigilance Committee kaban peitngor ruh ïa ka jingdon ki kam sniew ha ki shnong ki thaw.
“Kane ka long ka jingpyrkhing ha ki shnong bad ngi hap ruh ban shim sa kawei pat ka rukom treikam ban pyrkhing ha kaba ki Rangbah Shnong kin pyntreikam,” u la ong.
U Bah PN Syiem u la ai ruh ka jingïaroh ïa ka EC hapoh ka jingïalam ba shemphang jong u CEM ba ki la lah ban pynurlong ïa kine ki Bill baroh hynriew tylli.
U ong ruh ba ki long kiba donbok ba dei ha ka samoi pynjlan ba kine ki Bill ki la long aiñ lut baroh.
“Ka don ka jingmyntoi ïa kiba thrang ban trei na ka bynta ka Ri bad ka Jaidbynriew haba ka don kum kane ka jing pynjlan ïa ka samoi treikam jong ka Council,” u la ong.
