Shillong, Naiwieng, 10: U nongïalam ka Liang Pyrshah u Mukul Sangma ha ka sngi Palei u la ong ba ka Sorkar Meghalaya Democratic Alliance (MDA) ba la ïalam da ka National People’s Party kam don skhim eiei hynrei ka la pyntreikam beit ïa kajuh ka skhim kiba dei hi na ka tyllong jong ka Integrated Basin Development and Livelihood Promotion (IBDLP).
U Mukul uba long ruh u Parliamentary Party Leader jong ka AITC u la kdew ruh ïa ki jingshah thok ha kaba pyntreikam ïa ka skhim FOCUS da ka MDA.
“Ha ka por ka sorkar jong nga, ban pynthikna ba ki longing kin ïoh ïa ki lad jingïarap, ngi la wanrah ïa ka Integrated Basin Development and Livelihood Promotion project. Ka skhim FOCUS ka dei shi bynta na kane ka Basin Development scheme,” u la ong.
Haba kren ha ka jingïalang jong ka AITC ha Selsella, West Garo Hills district, u Mukul u la kynthoh tyngeh ïa ka Sorkar MDA da kaba ong, “ka Meghalaya Integrated Transport Project ka dei na ka bynta ban leit jingleit, na ka bynta ka khih ka kamai, ban pynïasoh ka iew ka hat na ka bynta ban kyntiew ïa ka rep ka riang. Ka MITP ka la ïoh pisa haduh 120 billion dollars na ka World Bank. Ka Sorkar MDA ka la kam ba ka la pynlut tang hapoh ar snem. Hynrei, ngim shym la ïohi ïa kino kino ki kam pynroi kiba paw wat hadien san snem.”
“Nga la pynsdang ïa ka Women’s Economic Empowerment lyngba ka Financial Power scheme. Nga la ai T.5,000 hajar sha ki kynthei ban plie ïa ki Bank Account,” la pynkynmaw u Mukul ïa ki kam ba la leh mynba u dang long u Myntri Rangbah ka jylla.
“Hadien ba la ïoh bat ïa u lakam synshar ha u snem 2018, ka Sorkar ka la pynkylla lut ïa ki skhim. Ka pisa ka dang don, hynrei ki paidbah kim shym la ïoh jingmyntoi eiei. Lada ngi ïoh bat ïa u lakam synshar ha u snemn 2023 ngin sa pyntikna ban sam lut ïa ka pisa kaba dei hok jong u paidbah,” u la ong shuh shuh.
U MLA ka Rangsakona u Zenith Sangma u la kyntu ïa ki paidbah ba ki dei ban pyndonkam ïa ka bor jingstad haba jied ïa ki nongmihkhmat ynda la wan ka Elekshon. “Ha ka elekshon ka ban sa long ha u snem 2023, ngi dei ban shim ïa ka rai kaba dei shwa ban leit sha ki jaka thep vote khnang ban pynthikna ba ka shongsuk shongsaiñ kan ïoh jaka ha ka ri bad ki longdien kin ïoh ïa ka lawei kaba shngaiñ.”
