Ym don jingkyrmen shuh ki bahaïing ïa u Bah Marshall ba un dang im

Shillong, Rymphang, 05: Ki bahaïing hasem kim don shuh ka jingkyrmen ba u Bah Marshall Marweiñ un dang im hadien ba u la jah rngai ha ka jingtwa ka synrum jaboh ha Marten ha ka por kumba 11:00 baje eiei mynstep ha ka sngi Saitjaiñ jong ka taiew baladep.
Wat hadien 60 kynta ba ki nongtrei ka State Disaster Response Force (SDRF) hapoh ka jingïalam jong u 2nd in Command Bah B. Sahkhar ki la la hiar sha Marten ban wad ïa u Bah Marshall ryngkat ka jingïatreilang bad ki nongtrei jong ka Shillong Municipal Board, hynrei haduh mynta kim pat lap dien satia ïa ka met jong u Bah Marshall Marweiñ uba la shah tep im ha ka jingtwa ka synrum jaboh ha Marten.
U Bah Marshall u la jah rngai naduh ka sngi Saitjaiñ jong ka taiew baladep ha ka por kumba 11.00 baje mynstep hadien ba ka synrum jaboh ka la twa ha Marten kaba la long ka jaka thehñiut ha Mawlai mynta la 86 snem, kata naduh u snem 1938. Ka jingai jingïarap ka la sdang naduh ka por kumba 1:30 baje noh sngi.
Watla ki nongtrei jong ka Shillong Municipal Board (SMB) ki la trei shitom naduh ka sngi Saitjaiñ haduh mynta ka Lah Sngi u Blei hynrei kim pat lapdien satia ïa u.
Ka Kong Thilda Mary Lyngdoh Mawphlang kaba dei ka Hymen kynsi jong u Bah Marshallha ka jingïakren bad u nongthoh khubor ka la ong, kum ki bahaing hasem kim don jingkyrmen shuh ba un dang im hynrei watla katta ki kyrpad ïa ki nongtrei ka Municipal bad ïa ka kynhun SDRF ba kin dang bteng ban wad ïa ka met jong u haduh ban da lap khnang ba kin ym don hapdeng ka jingsahnud.
“Ngi ai khublei ïa ki nongtrei ka Municipal bad ïa ka kynhun SDRF kaba la trei shitom ban wad ïa i (bah Marshall) bad kum ka iing ngim don jingkyrmen shuh ba in dang im,” la ong ka Hymmen Kynsi.
U Chief Executive Officer (CEO) jong ka Shillong Municipal Board u PK Boro bad u Executive Engineer Bah F.B Chyne ha ka sngi u Blei ki la hiar jurip da lade sha Marten ban peit ïa ka jinglong jingman tang shu ïoh jingtip halor kane ka jingjia ba sngewsih.
“Ngi kyrmen ban ïohi ïa ki dak ki shin ban lapdien ïa u Bah Marshall bad ngi la suba ruh un im shuh hi ruh,” la ong u Bah Chyne ha ka jingïakren bad ki lad pathai khubor ha ka Sngi u Blei.
Kum ka jingsngewlem, u CEO bad u Executive Engineer ki la leit jngoh ïa ka ing jong u Bah Marshall bad ban ïakynduh ruh ïa ka kurim ka jong u bad ïa ki bahaing hasem ban pynpaw ïa ka jingsngewsih halor kane ka jingjia.
U Bah Marshall Marweiñ bad ka kurim jong u, ka Kong Darisha Lyngdoh Mawphlang ki don arngut ki khun, iwei i shynrang ba la 3 snem ka rta bad i kynthei ba la 2 snem ka rta bad kine ki shikurim im da ka kam wad marjot ha Marten.