Shillong, Rymphang 05 : Ki la don haduh lai ngut ki MDC na ka Congress kumjuh ruh na ka sem UDP kiba pynkhreh mynta ban leit pynïasoh noh sha ka National People’s Party (NPP) kum shi bynta ban pynkhreh ïalade na bynta ka elekshon MDC kaban sa long shen.
Ïa kane la pyntikna ruh da u Nongïalam ba rangbah jong ki MDC ka NPP ha KHADC ba dei ruh u Chief Executive Member ka Council Bah Pynïaid Sing Syiem haba kren bad ki lad pathai khubor.
“Kumba long haduh mynta ka sngi, ki don lai ngut ki MDC kiban wan pynïasoh noh bad ngi sha ka NPP, hynrei kane ka lah ban nang kiew,” u la ong da kaba pynkynmaw ba dang ha kine ki khyndiat sngi u MDC ka Congress na Mairang, Bah Batskhem Ryntathiang u la dep ban pynïasoh sha ka NPP.
Haba jubab halor ka jingkylli, u Bah Pynïaid u la pyntip ruh ba ka jingwan pynïasoh jong kitei ki MDC kadei namar ki ïohi ïa ka rukom treikam jong kane ka EC ba mynta hapoh ka jingïalam jong ka NPP.
“La pynbeit ba ka jingpdiang burom ïa kine ki MDC na kitei ki party ba wan pynïasoh sha ka NPP kan long hadien ba la kut ka Dorbar Mangtyngka jong ka Ïing Dorbar Thawaiñ ka jylla,” la ïathuh shuh shuh u Bah Pynïaid.
Da kaba kyntait ban ïathuh ïa ka kyrteng jong kine ki MDC kiban wan pynïasoh thymmai, u Bah Pynïaid u la ong ba kane ka kynti kaban wan wat ki nongïalam party jong kitei ki MDC ruh kin kyndit ynda la dei ka por.
Lah ban kdew hangne ba hadien ka jingwan pynïasoh NPP jong u Bah Batskhem Ryntathiang, ka Congress mynta ka don sa tang saw ngut ki MDC, ba kynthup ïa u Deputy CEM ba mynta Bah PN Syiem, nangta u Executive Member Development ba dei ruh u MDC ka Mawkyrwat Bah Carnes Sohshang, Bah Gabriel Wahlang MLA/MDC Nongstoin, Bah Ronnie V Lyngdoh MLA/MDC Mylliem bad ruh u Bah Charles Marngar MLA/MDC ka Mawhati bad Deputy Chairman jong ka Council.
