Lada pan jingisynei ki paidbah ki ong ka jaboh, ïalade ki pynap syndon da ka borti: NPP
Mawkyrwat, Rymphang, 05: U State Youth President jong ka National People Youths Front (NPYF) Bah Kitborlang Nongrem ha ka Lah Sngi u Blei u la ong ba ka jingkynthoh jong u Nongaiktien ka Voice of People Party (VPP) Dr. Batskhem Marboh ki long ki bym shong-nia.
Halor ka jingkynnoh bamsap da u nongaiktien ka VPP ia u Bah Kitbok Nongrem tang na ka daw ba u don ha ka liang jong ka Sorkar, u Bah Kitborlang Nongrem u la ong, “hato baroh kiba don ha ka liang jong ka sorkar ki bamsap mo bad naduh mynno ka VPP ka don ïa kata ka jingpynshisha ba kata ka sorkar ka bamsap lane kata VPP ka lah ban long noh kum ka nongbishar ïa ka jingbamsap jongno jongno kynthup ïa u Bah Kitborlang Nongrem?
U Bah Nongrem u la ong ruh ba u Nongaiktien jong ka VPP u la kynnoh ba ka Sorkar ka dei kaba bamsap bad ka la pynlong ïa ki MLA tang kum ki nongrah bowl bad kumjuh ruh halor ka Reservation Policy ba u (Bah Kitboklang Nongrem) u la ïa shah ïa ki jaitbynriew Garo. “Ngam sngewpher ïa ki jingshah kynthoh bad ki shah dait hano hano namarba ïa u briew uba kup ïa ka musari wat u skaiñ pyrjong ruh um ïoh lad ban dait hynrei ïa kiba trei ha ki lyngkha, ki risai da ki phew jait ki khñiang ki wan dait,” la ong u Bah Nongrem.
“Nga lah mo ban die ïa ka ri tang marwei haba ka jingdon briew ha ka ri India ka don kumba 160 klur bad hato kata ka jingshah kynthoh ba marwei nga lah ban die ïa ka ri ka lah ban long? la kylli u Bah Nongrem.
“Ngi sngewdonbok ba u Prah u jop tang 4 ngut ki MLA. Ah! ban jin da la jop kham bun ka VPP ym tip kaei ka ban jia ïa ki paidbah, namar kine ki la kren shai ba kim don jingisynei ïa ki paidbah katkum ka jingkren jong u nongaiktien ka VPP ha ka jingkynthoh jong u,” la kynthoh sa u Bah Nongrem.
U Bah Nongrem u la ong ba u Nongaiktien jong ka VPP um pat sngewthuh bha halor kane ka mat ïa ka dor jong ka jingleh isynei ïa ki baduk ba kyrduh namarba kaba i-thamula ïa kine ki briew ka long ba lada pan jingisynei ki paidbah ki ong ba ka pynjaboh, hynrei ïa lade pat la ïohi tynkreiñ ba ki pynap syndon da ka borti ban pan jingisynei.
“Namarkata, hato ka jingpynap borti jong ki na u paidbah ka long mo kaba khuid bad hato ka jingleit pan isynei na ki paidbah ka long kaba jaboh? la ong u Bah Nongrem da kaba kyntu ruh ia ki paidbah ba kin long kiba husiar ïa kum kine ki nongïalam ki bym don ïa ka dohnud bad ka mynsiem jingsngewsynei ïa ki para briew.