Ym dei u khaw plastic, dei u khaw khleh Vitamin, pynshai ka tnad Food Civil Supplies

Nongpoh, Nohprah, 15: Ka ophis jong u Deputy Commissioner, Ribhoi District lyngba ka tnad Food Civil Supplies & Consumer Affairs Department mynta ka sngi ka la ai ïaka jingpynshai sha ki paidbah ha kaba ïadei ba u khaw plastik ba bun ki paidbah ki sngewthuh bakla, hynrei ki dei ki khaw bala khleh vitamin bad mineral (Fortified Rice).
Haba kren haka jingpynshai paidbah kaba la long ha khmat jong ka Nongpoh Urban Shopping Complex ha Nongpoh, ka Dr DBS Mukhim Asst. Commissioner ka Foot Safety Meghalaya kala pynshai sha ki paidbah ba kim dei ban ngeit kulmar bad shah ïalam bakla haki khubor ba shukor bad kiba pyntieng ïaki paidbah khlem da tip ïaka jingshisha.
Ka la ong ruh ba ngi dei barabor ban shañiah ïaki jingbam kiba la don ïa u Symbol Plus F (+F) haka rong kaba blue kaba pynshisha ba ki la dei ki marbam kiba long tikna ban bam, bad lada ki paidbahki lap ïaki marbam ki bym don ïa une u symbol Plus F, ki lah ban ujor lane ban wan ïa kynduh ïaki ophisar jong ka tnad ba dei peit ban pynbeit ïa kane ka kam.
Ka Kong Mukhim ka la ban jur ruh halor ka jingphriang ki khana u khaw plastic bala khleh lang bad ki khaw ba ki paidbah ki ju bam ha kaba kala pynshai ba kane ka long kaba lamler bad kaba thmu ban ïalam bakla ïaki paidbah, ka la pynshai ruh ba kam shym la don ka jingpynmih ïa u khaw plastic na kino kino ki company hynrei ïa u khaw u ba la fortified lane “Fortified Rice” u dei u khaw u ba don ki jingbam kiba tei ban pynkhlaiñ ïaka bor met da kaba khleh ïaki vitamin bad mineral ban pynioh ïaki jingdonkam kiba kongsan haka met u briew.