Ym dei tang kum u HM hynrei kum u CM ngi donkam ïa u Bah Ardent: Adelbert

Shillong, K’lyngkot 12: U MLA barim ka North Shillong u ban dei ruh u kyrtong ka VPP na kane ka constituency u Bah Adelbert Nongrum, u la ong ba ka jinglong jingman ka jaidbynriew bad ka jingsator ki aiñ ki kanun kiban wanrah jingshngaiñ ïa ka ka dei namar ngim don nongïalam kiba don ka jingkit khlieh ïa ka jaidbynriew bad ka lawei jong ka bad dei namar kata ka daw ba ka la dei ka por ïa ki paidbah ban pynjop bun ngut ki MLA na ka VPP khnang ba u Bah Ardent un ïoh lad ban shakri ïa ka jaidbynriew kum u Myntri Rangbah.
Haba kren ha ka jingïalang ka pynshai paidbah jong ka VPP ïa ki nongrim jong ka party ha Motphran, u Bah Adelbert u la ong, “Kam dei shuh ba u Bah Ardent un long tang kum u Myntri Kam Poh Ïing ka jylla hynrei ka la dei ka jingdonkam ba un ïalam ïa ka jylla kum u Myntri Rangbah khnang ban wanrah jingsngaiñ biang ïa ka jaidbynriew.”
U la ong ruh ba ka jingjied jong u ïa ka VPP ka dei namar ki nongrim kiba u ïeng kata naduh ka Reservation Policy, u pud u sam, ka ïohkam ïohjam, ka rta ïohkam bad kiwei ki nongrim kiba u ïeng ki ïoh jaka lang ha ka VPP bad ong ruh ba dei namar ka jingïoh jaka ki nongrim kiba u ïeng naduh mynsuwa ha ka VPP ba u kloi ban leit pynïasnoh bad ka.
Shuh shuh haba kren halor ka jingkyrduh nongïalam u Bah Adelbert u ong ba kumba long mynta ka jaidbynriew kam don nongïalam shuh hynrei tang ki nonglilam ïa ka.
“Kita kiba ju pyrta nongïalam ki kylla nonglilam bad kita kiba pyrta ban ïada ïa ka jaidbynriew ki leh mar khongpong bad kum ka jaidbynriew ka dei ban sngewthuh ïa kane,” u la ong.
Haba kren halor ka jingtreikam ka sorkar u Bah Adelbert u la ong ba ka jingkren pyrshah jong u ïa ka sorkar kam dei tang mynta ba la jan ïa ka elekshon hynrei naduh ki sngi kiba nyngkong eh ruh haba dawa kakam ba un kren.
“Ka jingkren pyrshah ïa ka sorkar kam dei ba nga pyrshah ïa ka sorkar hynrei ïa ki policy jong ka kaba leh klet pat ïa ka jingshngaiñ ka jaidbynriew,” u la bynrap.
U la ong ruh ba kum u MLA u la pyrshang ha la ka bor ba tang marwei hapdeng ki 60 ngut ban kren ïa ki mat ka jaidbynriew.
“Ka jingdawa ban pynjla ïa ka rta ka la urlong bad sa kiwei ki mat kiba dang sahteng kiba ngin hap pyndep kata naduh ka thungkam thungjam kaba khuid bad kiwei kiba ngin pynleit jingmut kum ka party,” u la ïathuh.
Shuh shuh u la ong ba ka jingshah leh kput ka jaidbynriew ha ka sorkar ka la dei ka por ba ki paidbah kin pynrem kput ïa ka sorkar.
U la ong ruh ba kum ka jaidbynriew ka dei ban long kaba shai ha ka jingjied nongmihkhmat sha ka ïing dorbar thaw aiñ namar ka jaidbynriew kaba ngoi ngoi kan dei ka jingduhnong ïa ka hi.
“Ngi dei ban sngewthuh ba kano kano ka jaidbynriew kaba ym don ka jingïohi jngai kan dei ka jaidbynriew kaban sa jah rngai bad ngam kwah ba kum ka jaidbynriew ngin shu jah rngai noh hynrei ba ngin long ka jaidbynriew kaba shai ban shngaiñ bad ban im ka pateng ban dang wan,” ong u Bah Adelbert.