Shillong, K’lyngkot, 12: Ka rai jong u MLA ba mynta jong ka Mawphlang Constituency ban ym ïakhun shuh ïa ka elekshon mynta u snem kam shym la pynduh mynsiem ïa ki nongkyrshan jong ka United Democratic Party (UDP) namarba ka seng ka la sei bujli da u Bah Mathew Beyondstar Kurbah u ophisar ba shongthait kum u Chief Engineer ka MeECL.
Ïa u Bah Mathew la pdiang burom da u President ka UDP u Bah Metbah Lyngdoh ha ka sngi Palei ha Madan Shad, Mawphlang bad la pynbna syndon ïa ka kyrteng u Bah Mathew kum u kyrtong u ban ïakhun ha ka elekshon kaban wan na Mawphlang konstitwensi.
U Bah Metbah Lyngdoh haba kren ha ka jingïalang u la pynpaw ba ka UDP ïa mynta ka la dei ka party trai ri kaba heh hapoh ka jylla Meghalaya bad ka jingmih ka UDP ka long ban wanrah ïa ka jingïatylli kawei hapdeng ki nongïalam ba la saiñ dur na ka APHLC bad ka jingkynjoh jong ka jylla sha ka 50 snem, hato kam la dei ka por ban synshar noh hi da ki party trai ri.
“Ka Lawkyntang ha Mawphlang ka long ka nuksa, ba la pynïaid hi da ka Hima bad kan jia ïa u lada aiti sha kiwei ban pynïaid ïa ka” ong u Bah Metbah bad bynrap ruh ba ha kane ka kynti ba mynta ka UDP ha Mawphlang kan ym dait thah.
U MLA ka Mawphlang u Bah Eugene Lyngdoh haba kren ha ka jingïalang u la pynpaw ba ka rai ba u la shim ban ym ïakhun shuh ïa kane ka election ka daw ka dei namar ba um kwah ban shakri ar kynrad namar baroh ki kam kin sat hut lut baroh, hynrei u la pynpaw ba un don beit ryngkat bad ka party UDP ha kane ka election bad kumjuh ruh bad ki kyrtong jong ka party bad u la kyrpad ruh ïa ki paidbah nongkyrshan ka party ba kin ïa trei shitom lang ryngkat da kaba don akor na ka bynta u kyrtong ka UDP.
U Bah Mathew Kurbah haba kren ha ka jingïalang ba la pynbna ïa u kum u kyrtong ka UDP na Mawphlang u la pynpaw ba u ladep ban shongthait na ka kam kaba u shakri 33 snem kum u shakri Sorkar hynrei ha kane ka kynti ba mynta pat u kwah sa ban shakri ïa ki paidbah jong ka Mawphlang Congstituency bad ïa ka jylla hi baroh kawei.
U la pynpaw ba u pynleit jingmut bha na ka bynta kane ka election kadei halor ka jingsahdien jong ki surok bad ki lynti ki syngkien, ki jaka pule puthi bad kumjuh ruh halor ka jingeh ki nonghikai, da kaba u la pynpaw ruh ba ki kmie ki kpa kin khmih lynti kumta ba ki khun ki kti kin ïoh ïa ka jingnang jingstad ba bha lada ki nonghikai ki ju kynduh jingeh.
U la ong ba ryngkat bad u MLA ba mynta jong ka Mawphlang kin ïai buddien ïa ki dienjat jong u Bah SK Sunn kiba la prat lynti ha kaba ïadei bad ki kam ki jam na ka bynta ban pyndep ïa ki kam ba dang sah bad u la pynpaw ruh ba u la tip bha kumno ban pynïoh ïa ki skhim lada u ïoh ïa ka jingjop ha kane ka election namar ba u la tip bha ha kaba ïadei bad ka jingïaid jong ki skhim ha Secretariat.
Kiwei kiwei kiba la ai jingkren ha kane ka sngi ki kynthup ïa u General Secretary ka UDP u Bah Jemino Mawthoh, u dkhot ka Khasi Hills Autonomous District Council (KHADC) u Bah Mitchell Wankhar bad u MDC ka Langkyrdem u Bah Ryngkat Lyngdem.
Ha kane ka sngi u General Secretary ka UDP u Dr. Jemino Mawthoh u la pdiang burom sha ka party ïa ki radbah kiba dei ki nongïalam ba ha khmat eh kiba dei na ki dong bad ki kyntoit bapher bapher kiba hap hapoh ka Mawphlang Constituency kiba dei na ka party Congress, National People Party bad kumjuh ruh na ka Meghalaya Pradesh Trinamool Congress.
