Bym ïoh kyrtong kiba biang ym dei ba ïasngewthuh jingmut bad ka BJP & UDP

Ba khlem pyniakhun na South Shillong bad Mairang

0

Shillong Kyllalyngkot 12: U National President ka National People’s Party (NPP) u Conrad K Sangma hynne ka sngi ula kyntait ban don kano kano ka jingïasngewthuh jingmut bad ka seng BJP bad UDP ban ym pynïeng kyrtong na South Shillong bad Mairang constituency.
“Kam don kano kano ka jingïasngewthuh jingmut hynrei ka daw ka dei namar ka party kam ïoh ïa ki kyrtong kiba biang ban ia aireng” ong u Conrad Sangma haba ïakren bad ki nongthoh khubor hynne ka sngi.
Kumba long mynta ïaka Mairang Constituency la mihkhmat da u President ka UDP u Bah Metbah Lyngdoh uba long ruh u Lamphang ka ïingdorbar thawaiñ ka jylla katba ïaka South Shillong la mihkhmat da u MLA ka BJP u Bah Sanbor Shullai uba long ruh u Myntri ka sorkar jylla.
U Conrad Sangma ula pynpaw ba ka dawbah hi, kadei ka jingbym lah ka seng ban ïoh ïa ki kyrtong kiba biang ban ïakhun ïa ka elekshon na kitei ki constituency bad kumta kala rai ban pynïeng 58 ngut ki kyrtong na ki 60 tylli ki constituency kiba don ha ka jylla.
“Ka long kaba jia ryngkhat ba ngim shym la ïoh ïa ki kyrtong, watla kila don katto katne hynrei ngim shym la hun satia ïa ki briew kumta ka seng kala shim ïa ka rai ban ym pynïeng kyrtong na Mairang bad South Shillong,” ong u National President ka NPP.
“Kam don kano kano ka jingïasngewthuh jingmut bad ka UDP ne BJP. Phi lah ban ai ïa kano kano ka rai ne ka jingsngew ka jong phi, hynrei ka jingshisha hi kadei kadei kumba nga la dep ban ïathuh ïa phi” ong u Conrad.

Leave A Reply

Your email address will not be published.