Pahara ki Pulit ïa ka khyrdop ba byrngem khang tala ka HNYM ïa ka ophis KHADC

Shillong, K’lyngkot, 12: Ki dkhot jong ka Hynñiewtrep National Youth Movement ha ka sngi Palei kiba dang thmu ban leit khang tala ïa ka ophis treikam jong ka Khasi Hills Autonomous District Council (KHADC) ki la ïatakhuh pynban bad ki bor Pulit kiba la ap pahara hakhmat ka khyrdop ban rung shapoh ka phyllaw jong ka Council.
Namar ka jingbym ïohlad ban rung shapoh, ki dkhot ka HNYM ki la shu pyrta da ki sur ban pynrem ïa u Chief Executive Member (CEM) ka KHADC u Bah TW Chyne bad ïa u Executive Member i/c Elaka u Bah Jambor War da kaba kynnoh ba kim shym la sngap ïa ka jingdawa jong ka seng ban weng mardor ïa u Acting Chief jong ka Hima Mylliem u Bah Ainam Manik Syiem halor ka jingkynnoh ba u donkti lang bad u Syiem ka Raid Marwet u Bah Ken Syiem bad ki Rangbah Shnong Garo ban die duh da ki spah akar ki jaka ki puta jong ka Hima kiba hap hapoh ka Raid Marwet.
U Deputy Secretary ka Khasi Hills Autonomous District Council uba la mih na kamra ban ïakynduh bad ki nongïalam ka HNYM um shym la lah satia ban ai ïa kano kano ka jingkular hynrei u la pynjaijai ïa ki da kaba ong ba un sa rah ïa ki mat jingdawa sha u Chief Executive Member (CEM) hadien ba ka seng ka la por tang shitaiew, kata, haduh ka 19 tarik mynta u bnai ba ka District Council ka dei ban weng noh mardor ïa u Acting Chief ba mynta jong ka Hima Mylliem hynrei lym kumta ka seng ka la byrngem ban shim da kiwei pat ki sienjam kiba kham tyngeh.
Ha ka jingïakren bad ki lad pathai khubor, u President ka HNYM u Bah Louis Dohtdong u la ong ba ka seng kan aipor tang haduh ka 19 tarik mynta u bnai ba ka District Council ka dei ban weng mardor ïa u Acting Chief jong ka Hima Mylliem u Bah Ainam Manik Syiem bad ban ym ai jingithuh satia ïa ki Rangbah Shnong Garo kiba pynïaid ïa ka synshar ka khadar ha ki shnong ba la buhai shnong da ki jaidbynriew Garo kiba dang hap hapoh ka Raid Marwet.