XVII MIFT 2024 : Jop ka Nongbri Brothers FC da 3 – 2 kol ïa ka Ehrngiew FC ha ka Quarter Final ba ar

Mawkyrwat, ‘Naiwieng 24: Ka Nongbri Brothers Football Club ka la long ka nongjop hadien ba ka la pynliem noh da 3 – 2 kol pyrshah ïa ka Ehrngiew Football Club ha ka lympung ïalehkai kynjatbol jong ka Quarter Final ba ar ba la tip kum ka XVII Mawlangwir Invitation Football Tournament 2024 ba la pynïaid da ka Mawlangwir Sports Club hapoh madan Rowell Lyngdoh Stadium Mawlangwir, South West Khasi Hills District.
Ha ka jingïalehkai jong ka kylla step ka Ehrngiew Football Club ka la ïoh ban thep nyngkong ïa ka kol ha ka minit kaba 24 na u Sammy bad pynbud sa ka kol kaba ar na u Banshan ha ka minit kaba 38. Hadien kine ki kol na ka liang ka Nongbri Brothers FC ruh kam shym la duh mynsiem bad ka la ïaleh katba lah ban pynphai ïa ka kol bad dei ha ka minit kaba 34 ka la ïoh ïa ka shi kol na u Wantiplang Syiem bad ha kaba ha ka jingïalehkai jong ka kyllastep ki la ïoh ban thep kol da 2 – 1 kol.
Nangta, haba wanphai ha ka jingïalehkai jong ka kyllamiet ka Nongbri Brothers FC ka la sdang ban ïalehkai khambha shuh shuh ha kaba ka la ïoh ban thep sa ïa ki ar tylli ki kol kata ha ka minit kaba 58 na u Thran Khongïong bad kawei pat ka kol ka dei ha ka minit kaba 61 na u Shanbor Nonglang. Kumta ha kane ka jingïalehkai Quarter Final ba ar ka Nongbri Brothers FC ka la tam noh da 3 – 2 kol pyrshah ïa ka Ehrngiew FC.
Ka jingïalehkai kaba bud kan long ha ka 28 tarik u ‘Naiwieng, 2024 hapdeng ka Rymbai Combine Football Club na East Jaiñtia Hills District pyrshah ïa ka Mawlai Sports Club na East Khasi Hills District ha ka por 1:30 baje nohphai sngi ha madan Rowell Lyngdoh Stadium Mawlangwir, South West Khasi Hills District.