Da ka SOP halor ka jingpyndonkam ïa ki Pulit Synran, siren, tah ïit ïong, pynbna u Myntri Rangbah

Shillong, Naiwieng 22: Kum shi bynta ban tehlakam ïa ki jingleh baheh jong ki briew kiba don ha ka bor na ka liang u Myntri Rangbah ka Jylla u Conrad K Sangma ha ka sngi Thohdieng, ula pynbna ba ka Sorkar kan sa wanrah noh da ka Standard Operating Procedure (SOP) halor ka jingpyndonkam ïa ki siren, tah ïitïong bad pyndait ïa ki light pynthaba halor ki kali bad kan pyrrkhing bha noh khnang ban nym ktah eh ïa ki paidbah ha ka leit ka wan.
Halor kane na ka liang u Myntri Rangbah ula ong, “Nga la ïohpdiang ïa shibun ki jingujor bad ki jingbynniaw na ki nongshong shnong halor kaei kaba ki briew ki ong ka VIP culture. Ka dei, hooid, ka kam kaba sngewkhia. Hynrei ngi hap ruh ban peit na kiba bun ki liang.”
U la ong, “Ka don ka jingsngewkhia ïa ka jingïada bad jingshngaiñ, ka bym dei ban pynïakhleh bad ka kam ba dei ban leh. Ka jingshngaiñ bad jingïada ka dei kawei ka kam, kaba ngi sngew ba ka long kongsan bad ka bym dei ban ïapeiñ. Hynrei lada ïa kane ka jingsngewkhia ïa ka jingshngaiñ bad jingïada ka kylla long pynbna kum ka jingpyni rongphong bad la pyndonkam ha ka rukom ka bym dei, kane nga tharai ka dei shisha ka jingeh,” ula bynrap.
U Conrad ula ong, namar kata, ka long kaba kongsan ban teh kyndon noh ha ka lynti kaba dei ha kaba iadei bad kane ka bynta. Myntri Rangbah u pyntip ba ha ka taïew ba la lah, ula shong jingïalang bad u Symbud Myntri Rangbah ba khmih ïa ka kam pohïing (Police) Bah Prestone Tynsong, u Chief Secretary Bah DP Wahlang bad ka Director General of Police Kong Idashisha Nongreng bad la bthah ïa ka Tnad Pulit ba kan pynkhreh ïa ka SOP ban batai mano ba lah bad bym lah ban pyndonkam siren, tah ïitïong bad pyndait ïa ki light ba thaba bunrong.
“Hadien ba la dep pynkhreh, ngin sa pyntreikam pyrkhing noh ïa ka SOP, kynthup ïa ki kyndon kiba hap bud haba pyndonkam ïa ki siren, ki light thaba bad kiwei kiwei ki tiar,” ula ong.
U Myntri Rangbah ula ïathuh ba ïa kane ka SOP yn sa wanrah hapoh ka jingïalang jong ka kynhun Myntri hapoh ka taïew ban wan. “Ngin sa wanrah ïa ka SOP ba pyrkhing bha haba ïadei bad mano ba lah bad mano bym lah ban pyndonkam siren, tah ïitïong bad pyndait ïa ki light thaba halor ki kali, hangno ki lah ban pyndonkam bad kumno ki dei ban pyndonkam”.
U la ong ba ka kam ba ïadei bad ka jingshngaiñ bad jingïada ruh ka dei ka mat ba hap ïakhmih bha. Ki don ki kyndon kiba donkam ban hap bud ïa kito ki heh ki haiñ kiba hap ha ki kyrdan bapher bapher kum ki Z Plus, Z bad Y bad kine ki dei ki kyndon bala batai bniah, ki bym lah ban ïapeiñ.
U la ong, “Kine ki bynta ki dei ïa kiba hap ban pynbiang tarajur. Kumba nga la kdew, haba buh hakhmat eh ïa ka jingshngaiñ bad jingïada, ngi hap ban khmih ruh ban pynthikna ba ym dei ban pyndonkam bakla ïa ka, ka ban long pat ka jingpyndik ïa u paidbah. Ka jingpynbiang tarajur ïa kine baroh ar bynta ka long kaba donkam.”
“Ngi kyrmen ba lyngba kane ka SOP, ka ban sa mih shen, bad ka ban sa ïoh jingmynjur da ka Kynhun Myntri, ngi dei ban lah ban pynduna ïa ki jingpyndik ïa u paidbah,” ong u Myntri Rangbah.