Shillong, Naiwieng, 22: Da ki spah ngut ki paidbah nongshong shnong ka sor Shillong ha ka janmiet sngi Thohdieng ki la ïashim bynta lang ha ka jingthang mombati ban sngewlem ïa u samla Hudderfield Rymbui uba la duhei ïa la ka jong ka jingim halor ka jingkynnoh ba ka thuk thuk kaba u ñiah ka la shah tynrah ha ka kali jong ki Pulit kiba synran ïa ka kali ki heh ki haiñ kiba ïabeh ban leit sha ka sngi sdang jong ka tamasa Cherry Blossom kaba la long ha madan Kurkalang, Bhoirymbong ha ka 15 tarik mynta u bnai.
Ïa kane ka jingthang mombati kaba la long ha madan Malki, Shillong la pynlong da ki paralok bad ki bahaïing hasem jong u samla Hudderfield Rymbui kiba la dawa ïa ki bor jong ka aiñ ba ki dei ban pynïoh ïa ka hok jong une u lanot.
Ki paidbah kiba ai jingkren ha kane ka janmiet ki la pynrem jur ïa ki kali jong ki heh ki haiñ bad ki la dawa ruh ïa ka Sorkar ba ka dei ban pynkut noh shisyndon ïa ka “VIP Culture.”
Kum ban shu pynkynmaw, u samla Hudderfield Rymbui na ka shnong Nongtalang, West Jaiñtia Hills District u la duhei ïa la ka jingim hadien ba ka kali kaba synran ïa ki heh ki haiñ kiba ïabeh ban leit sha ka tamasa Cherry Blossom ha Bhoirymbong ka la syllad ïa ka thukthuk kaba u ñiah kaba don u nombor ML05-AD-0566 bad kawei ka samla kynthei.
Kane ka la jia ha ka por 5:30 baje eiei janmiet ha ka thaiñ Umsaw marjan bad ka ophis ICAR.
Ïa kine arngut ki samla la pynkit noh sha Holy Cross Hospital ha Umsaw hynrei ki doktor ki la pynbna ba u samla Hudderfield u la khladnoh na kane ka sla pyrthei.
