Nalor ba shah ieh khuswet, ki shnong ha Block-1 kim don kyrteng ha ka Khanasamari

Khliehriat, Naiwieng, 22: Ki nongïalam jong ka Jaiñtia National Council-Western Zone ha ka sngi Thohdieng ki la leit ban ïakynduh ïa u MLA ka Mookaïaw Constituency Bah Nujorki Sungoh ban pynpaw halor ka jingshah ieh khun swet jong ki shnong kiba don hapoh ka constituency kiba hap hapoh ka thaiñ Block-1, West Jaiñtia Hills District.
Ka seng ka la pynsngew halor ka jingbymbiang ki surok, ki lynti ki syngkien ha ka shnong Khadkhasla,Psiar, Mooluber, Skap Mowput, Chnong Thymmei, Moojem bad Madan Nongkylla.
Kane ka thaiñ ka la shah ieh beiñ naduh ki por ba mynshwa haduh mynta bad kim pat ïoh ïa ka surok rong.
Kum ban shu pynkynmaw, ka Sorkar Assam ha ki snem kiba la leit ka la pyrshang ban shna surok jubor sha kane ka thaiñ hynrei ki shnong kiba don ha ka thaiñ Block-I ki la ieng pyrshah ïa ka Sorkar Assam ban shna surok hapoh u pud u sam jong ka jylla Meghalaya. Hynrei watla katta, ka Sorkar Assam ka ladep shna ïa ka surok kaba la poi haduh ka shnong Chnong Thymmei.
“U Bah Nujorki Sungoh u la ïathuh ïa ngi ba u ju kren na ka por sha ka por hapoh ka Iingdorbar Thawaiñ ïa ki jingeh bad ki jingjynjar jong ki paidbah khamtam ha kaba ïadei bad ka surok ha ka thaiñ Block-1,” la pyntip ka seng.
“U MLA u la pyrshang ruh ban phah da ka jingthoh sha ka North Eastern Council (NEC) ha kaba ïadei bad kane ka kam,” la ong u kyrwoh na ka seng.
Ki nongïalam ka JNC ki la ïohlad ruh ban ïakren bad u MLA ha kaba ïadei bad ka jingbym biang ka bording elektrik hapoh ka thaiñ Block-I ba kynthup ha shnong Mooluber, Skap Mowput, Chnong Thymmei, Moojem bad Madan Nongkylla. “Ngi sngewkhia haduh katta katta ba kine ki shnong kim juh ïoh bording mynno mynno ruh watla na ka liang ki nongshong shnong ki da thrang ban ïoh ïa ka bording kumba ïoh lem kiwei kiwei ki shnong, hynrei ym don mano mano ruh ban peit lem bad ym don ba patiaw mano mano ruh naduh mynshwa haduh mynta,” la pyntip ka seng.
Ka JNC ka la pyntip ruh ba u MLA u la pynpaw hakhmat ki nongïalam ba um lah ban wanrah ïa ka bording hynrei watla katta u la kular ba un sa shimkhia ban pynsngew sha ki tyndong skhor jong ka Sorkar.
“Kaba pynlyngngoh shuh shuh ïa ngi ki nongïalam ka long ba ki shnong ha ka thaiñ Block-1 haduh mynta kim don bynta ne kim pat don kyrteng eiei ha ka khanasamari (census) jong ka ri India bad ym don mano mano ruh ba wan ban lum kyrteng ïa ki nongshong shnong ban pynrung ha ka Khanasamari ïa ki,” la pynpaw ka JNC.
Ka seng ka la kynthoh jur ïa ka jingleh klet ka Sorkar Meghalaya ïa ki briew kiba shong ha ka thaiñ khappud bad ong ba kane ka jingleh jong ka Sorkar ka long thik kumba ki la kheiñ mrad bad kheiñ riewkhlaw ïa kiba shong basah sha ka thaiñ Block-I bad ki pynduh ruh ïa ka hok ka longbriew manbriew jong ki.
Halor ka jingbym don kyrteng ha ka Khanasamari, u MLA u la jubab ba ka Sorkar kan sa pyrshang katba lah ban pyntreikam ïa ka jinglum Khanasamari ka ban sdang shwa na ka shnong Mooluber.
Ka seng ka la pynsngew ruh hakhmat u MLA ïa ka jingbymdon ka kali Ambulance ban kit ïa ki nongpang khnang ban pynsuk ïa ki paidbah ka thaiñ khamtam ha ka pang ka shitom.
U President jong ka Western Zone u Bah Hamehi Bamon u la ong ba ka seng kan sa buddien ïa kine ki kam kiba ladep pynsngew ha u MLA bad kan nym shong kli kti ban pynïoh ïa ki hok jong ki paid nongshong shnong ka thaiñ Block-I.