Wer u Conrad ïa baroh ki nongïalam Seng Saiñ Pyrthei kynthup ka TMC ban ïasoh noh sha ka NPP
Dadenggre, Rymphang 23 : U National President ka National People’s Party (NPP) U Conrad K Sangma mynta ka sngi Palei, ula khot bad wer ïa baroh ki nongïalam jong ki Seng Saiñ pyrthei bapher bapher kynthup ïa ki TMC ba kin wan ïasoh noh sha ka NPP bad ban ai ka jingshakri kaba khlaiñ ïa ka jylla.
“Kam don jingmut ban kyrshan ïa ka TMC ne kiwei kiwei ki party. Ka NPP kala pynkhreh ban thaw ïa ka Sorkar. To ngin nym pynsepei kai ïa ki vote jong ngi bad ban mih ha ka ban vote bad kyrshan ïa ka NPP” on gu Conrad ha ka rynsan ïalap elekshon ka NPP ha Dadenggre, ban pan jingkyrshan ïala u hynmen bad kyrtong ka NPP James PK Sangma, uba dei ruh u MLA ka constituency.
Haba ñiew ïa u Nongïalam ka TMC bad Myntri Rangbah barim u Dr Mukul Sangma kum u Nongïalam ba synshar donbor, u Conrad ula ong “U (Mukul) u lah ban ïasoh sha ka TMC hynrei u dei u juh u briew, uba la pyniap ïa bun ngut ki mynsiem ba lui lui. Ka Ri-lum Garo kan ym klet ïa ka jingjia ba 30 tarik u Nailur, ha kaba la duh noh haduh 9 ngut ki mynsiem”.
“U Mukul ula ieh ïa ka Congress, namar ka jingpyrkhat ba um don lawei shuh ha ka congress hynrei u khlem da kheiñ bha ba ki paidbah ka Ri-lum Garo kin nym pdiang ïa ka party kaba dei na shabar haba ki don ka lad ban jied ïa ka party nala ka jong ka Jylla” ula ong.
Haba kynnoh ruh ba u Dr Mukul ula treikam da kaba pyndonkam ïa ka bor bad kiar ïa ki jingïakren ha ka ban pynbeit ïa kino kino ki jingeh ne jingshah tynjuh, u Conrad ula ong ba ka NPP ka ngeit ha ka ban sngap ïa ka sur jong u paidbah. “Ngin yum leh da lei lei ruh ïa ki kam kiba ïaid pyrshah ïa ka jingangnud u paidbah. Ka NPP kum ka party ka ïeng skhem ha ka nongrim ban ïada ïa ka bha ka miat jong ki paidbah” ula ong.
Ula ong ba ha kine ki san snem kila don shibun ki jingtynjuh hakhmat ka Sorkar hynrei kila don ki khep ruh ba ki kynhun Sengbhalang kila hap ban ïakhun pyrshah ïa ka Sorkar hynrei ka Sorkar kam ju pyndonkam ïa ka bor bad kala jied ïa ka lynti jong ka jingïakren ban pynbeit ïa ki jingeh jong kine ki kynhun ba ïakhih.
Haba ñiew ïa la u hynmen James Sangma kum u Nongïalam ba don ka jingkitkhlieh, uba la trei ym tang ïa la ka constituency hynrei ka Jylla baroh kawei, u Conrad ula ai khublei ïa ki paidbah ka Dadenggre kiba la ai ka jingshaniah ha u.