Shillong, Rymphang 23: Ka nongaitien ka All India National Congress (AICC) ka Dr. Shama Mohamed mynta ka sngi Palei kala ther tyngeh baka Bharatiya Janata Party (BJP) ka dei ka jingma ïaki paid riewngeit Kristan bad ïaka snap kyrpang ki Riewlum lane ki Schedule Tribe (ST) kiba dei ki paid nong shong shnong ka jylla Meghalaya.
Haba kren sha ki lad pathai khubor ka Shama kala kam ba dang shen ka seng Janajati Dharma Sanskriti Suraksha Manch kaba dei ruh ka seng bala ithuh daka seng Rashtriya Swayamsevak Sangh (RSS), kala dawa ban pyndam noh ïaka jingithuh Scheduled Tribe (ST) ïa ki briew kiba la kylla sha ka niam Kristan.
Ka Shama kala ong ba kane ka jingdawa ka long pyrshah bad kaba ibeiñ ïa ki rit paid bad ïaka jinglong kyrpang ki riewlum ka thaiñ Shathei Lam Mihngi (North East) khamtam napoh ka jylla Meghalaya bad Nagaland.
“Kane ka paw shai ba ka BJP ka kwah ban pyntreikam ïaka aiñ ba long pyrshah ïaki riewlum bad ïaki riewngeit Kristan bad dei namar kane, ka BJP kadei ban jubab la kan pyntreikam ne em ïa kane ka juh ka buit lada ka wan haka bor hadien kane ka elekshon” la buh jingkylli ka Shama.
Ka Sharma kala kynnoh ruh ba ka sorkar BJP ka don jingthmu ban pyntreikam ïaka aiñ Uniform Civil Code (UCC) ha baroh kawei ka ri India bad kane ruh ka paw shai ba ka kwah ban ïuhroit ïa ki rit paid bad kane ka buh ruh ïa ka jingma ïa baroh ki riewlum (ST) ha baroh kawei ka thaiñ Shatei Lam Mihngi khamtam hapoh ka jylla Meghalaya.
Ka Shama kala kynnoh ruh ba ki briew kila shah thombor tang naka daw ba ki shah kynnoh bam doh masi lane kit ïaki masi bad ïa kine ki jingjia la sakhi na ka por sha ka por naduh ba synshar ka BJP. Shuh shuh kala buh jingkylli ba ka BJP kadei ban kren shai ïaka nongrim ba ka don haba ïadei bad ka jingpyrshah bam doh masi ha kiwei ki jylla katba ha Meghalaya bad Mizoram pat ki kren ba kim pyrshah kum ïa kine baroh.
Kane ka nongïalam ka Congress kala kam ba ka Congress kadei ka Party kaba synshar laitluid bad kadei ka party kaba burom ïa baroh khamtam ïaka jinglong kyrpang ki rit paid hapoh ka thaiñ Shatei Lam Mihngi bad ka jylla Meghalaya.
Haba kynnoh ïaka BJP ka don jingthmu ban pyndam ïaka khyrnit ba hynriew jong ka riti synshar ka ri India (Sixth Schedule) lyngba ka 125th Constitution Amendment Bill 2021. Ka la ong ba ka sorkar Mizoram ba ïalam daka seng Mizo National kala pyrshah ïa kane watla ka BJP ka don lang ha ka sorkar.
“ïaka khyrnit ba hynriew jong ka riti synshar ka ri India (Sixth Schedule) la wanrah daka sorkar Congress ha Meghalaya kum shi bynta ban ai jingithuh kyrpang bad ban ïada ïa ki rit paid riewlum ka jylla namar ka Congress ka burom lut ïa baroh salonsar” la ong ka Shama.
