Dawa u Bah Ardent ban pynshisha u Bah Embhah ba kynnoh wanrah aiñ pynkylla jait sha u shynrang
Shillong, Rymphang 23: U Bah Ardent Miller Basaiawmoit, President ka VPP, u la dawa ba u Bah Embhah Syiemlieh, MLA bad MDC barim ka Mawlai, udei ban pynshisha halor ka jingkren ïalap elekshon jong u ha Mawlai ha kaba u la ong ba u Bah Ardent ha ka por ba u long CEM ka KHADC ha ka snem 2014, u la wanrah ïa ka Aiñ ban pynkylla jait sha u Shynrang.
Haba kren ha ka jingïalap elekshon ha Nongkseh, u Bah Ardent u la ong ba kane ka jingkren u Bah Embhah kadei ka kam kaba khia Shibun bad kaba pynjah burom ïa u.
“Kaei kaba u Bah Embhah u kren ha ka rynsan elekshon ha Mawlai, kadei kaba ktah shibun ïa u khamtam kum ha kane ka por elekshon”, la ong u Bah Ardent.
Kumta u la dawa ba u Bah Embhah udei ban pynshisha ïa ka jingkren jong u halor kata ka Aiñ kaba u la kynnoh. U la ong ba lada u Bah Embhah um lah ban pynshisha un dawa da ka bai mynraiñ khmat bad udei ban panmap ruh.
Lada u MLA bad MDC barim ka Mawlai um lah ban leh ïa kane, na ka liang u Bah Ardent un ujor sha ka Ïingbishar.