Shillong, Nailar 09: Ka Khasi Students’ Union, Mawlai Circle ha ryngkat lang ka Federation of Khasi Jaiñtia and Garo People (FKJGP), Hynñiewtrep National Youth Federation (HNYF) Mawlai Circle, ka khot ka wer ïa baroh ki paid nongshong shnong ka Mawlai bad ka bri u hynñiewtrep ban ïa mih lang ha ka lyngkhuh snem ba 3 jong u Bah Cherishterfield Thangkhiew (Bam kwai ha dwar u Blei) ha ka 13 tarik u Nailar 2024. Kane ka jingkynmaw tympang ïa ka lyngkhuh snem ba 3 kan long ka jingpynkynmaw bad jingbitar ïa ka jingle donbor ka Sorkar ban dkhat jubor ïa ka jingim u Bah Cherishterfield Thangkhiew, u sohkhliang, ka jingpaid dohnud jong ka ïing ka sem, kan ïai kyrsoi ha ka mynsiem jong iwei pa iwei ba da lei lei yn nym lah ban pdiang ïa ki kam thombor da ki bor Sorkar ha ka shynshar Paidbah, ka jingsah umdum haduh mynta, ka jingïaid laitluid ki riewthrang snam da lei lei kan nym pynklet ïa ka jaitbynriew.
Ha katei ka sngi na ka liang ka KSU, FKJGP, HNYF (Mawlai Circle) kin pynlong ïa ka jingwah ïa ki Lama ïong (Black Flag) kum ka dak ka jingpyrshah ïa ka jingïaid laitlan ki riewthrang snam naduh ka por 9 baje mynstep bad kumjuh ban synran lang ïa ka ïing ka sem ha ka jingleit buh syntiew kynmaw burom ïa u (Late) Cherishterfield Thangkhiew ha u lum Jingtep ha Lawmali ha ka por 2 baje nohphai sngi.
Kumta na ka liang ka KSU, FKJGP bad HNYF Mawlai Circle ki khot ki ïawer ïa baroh ban shim bynta lang ha katei ka sngi ka jingshim bynta lang jong baroh kan pynpaw ïa ka dak ba da lei lei ka Ri bad ka Jaidbynriew kan nym pdiang bad kan ïai ïakhun pyrshah ïa ki kam thombor pyrshah ïa la ki paradoh parasnam, ong ka kyrwoh ba la phah da u President ka KSU Mawlai Circle u Bah Biangbor Paliar bad u President ka FKJGP Mawlai Circle u Bah Khrawkupar Nongseij.
