Nongpoh, Nailar 09: U Myntri Rangbah ka jylla u Conrad K. Sangma ha ka sngi Thohdieng u la plie paidbah ïa ka building ba thymmai jong ka District Medical & Health Officer (DM&HO) ha Nongpoh kaba la tei naduh u snem 2021.
Ha ka jingplie paidbah ïa kane ka ophis la sakhi lang da ka Myntri ka tnad Koit ka Khiah ka Dr. Ampareen Lyngdoh, u MLA ka Nongpoh u Bah Mayral Born Syiem, ka District Medical & Health Officer ka Dr. Angel Kharduit, u Deputy Commissioner ka Ri Bhoi u Abhilash Baranwal lem bad kiwei kiwei ki ophisar sorkar.
Haba kren kum u kongsan, u Conrad u la pynpaw ïa ka jingkmen ba la lah ban pyndep noh ïa kane ka ophis ba thymmai ka DMHO bad kane ka jinglah ban pyndep noh ïa kane ka jingtrei ka long ka jingmyntoi na ka bynta ban ai ka jingshakri ha ka liang ka koit ka khiah.
U la ïathuh ruh ba ka Sorkar Jylla lyngba ka tnad ka koit ka khiah ka la mang pisa T. 18.4 klur ban tei ïa kane ka ophis building ka DMHO.
U la ong ruh ba ïa ki nongtrei na Civil Hospital Nongpoh yn pynkynriah noh sha kane ka ophis ba thymmai bad katei ka ophis barim ka DMHO pat yn pynkylla noh kum ka Trouma Centre ba ka sorkar kan pyntreikam noh bad kaba dei ruh kawei na ka jingdawa ki paidbah ban treikam noh kane ka Trouma Centre ha Ri Bhoi.
U la pynpaw ruh ïa ka thong jong ka sorkar jylla ban kyntiew ïa ka koit ka khiah ba la mang pisa haduh T. 70 klur na ka bynta ban pynbit pynbiang ïa ki 80 tylli ki jaka ai jingsumar ha ka jylla. Kane ka jingbei pisa ka sorkar ka long ruh ban pynbit pynbiang naduh ki jaka ai jingsumar bad ki jingdonkam bapher bapher, ha kaba kin sdang shuwa na ki 3 tylli ki Hospital ba kynthup ïa ka Shillong, Jowai bad Tura.
U la bynrap ruh da kaba ong ba ka sorkar kan mang pisa shuh shuh ruh ym tang ban pynbit pynbiang ïa ki jingdonkam ha ki jaka ai jingsumar, hynrei kan sa phai khmat kyrpang ruh ban pynbha ïa ki jaka trei ki nongtrei sorkar ha ka tnad ka koit ka khiah bad ruh ki Quarter jong ki, khnang ba kin dang pynjanai shuh shuh ïa ka jingshakri sha ki paidbah ha ka liang ka koit ka khiah.
