Shillong, K’Lyngkot 06 : U MDC ka NPP na Mawlai, Bah Teibor Pathaw ha ka sngi Nyngkong u la resaiñ noh na ka shuki Executive Member ha KHADC bad ha kajuh ka por u la pynkut lut ïa ka jingïadei bad ka party NPP ha ka jylla.
Kane ka sienjam ba une u MDC u shim kadei hadien ba ki paidbah ka Mawlai constituency ha ka jingïalang kaba long ha Mawlai Nonglum ha ka sngi Saitjaiñ ki la shim da kawei rai ba u Bah Teibor u dei ban mih ïakhun kum u kyrtong shimet ha kane ka elekshon MDC bad ban ieh noh ïa ka party NPP.
Haba ïadei bad ka shuki Executive Member ha KHADC, u Bah Teibor ha ka janmiet sngi Nyngkong ha ryngkat ka jingsynran lang ki nongïalam ba hakhmat u la leit ban aiti hi dalade ïa ka shithi weng jingkyrshan ha u Chief Executive Member ka Council, Bah Pynïaid Sing Syiem.
U Bah Teibor haba kren bad ki lad pathai khubor hadien kane u la pyntip ba nalor ba u la weng noh ïalade na ka shuki EM u la weng ruh ïa ka jingkyrshan na ka Executive Committee. U la ïathuh ba u la dep ruh ban phah ïa ka shithi sha u State President ka NPP Bah Prestone Tynsong ban pyntip ba u la pynkut noh ïa ka jingïadei baroh bad ka NPP.
“Kiei kiei ki rai ba ngan shim nangne shakhmat kan dei beit da ka bor jong u paidbah ka Mawlai constituency bad ngan kohnguh ïa ka rai jong u paidbah,” u la ong haba kren bad ki lad pathai khubor.
Nangta u la ïathuh ba ha ka shithi ba u phah sha u State President ka NPP u la pyntip ruh ba u la weng noh na baroh ki kam ba u bat ha ka party kum u President ka NPP Shillong City nalor kiwei kiwei.
Shuh shuh u ong ba katei ka rai kaba radbah ba u shim kadei namar u burom ïa ka rai ba u paidbah u shim ha katei ka jingïalang kaba dep ha ka sngi Saitjaiñ. “Kane ka rai kaba nga shim kadei namar nga burom ïa ka rai kaba u paidbah u thrang bad kwah ïanga ban leh,” u la bynrap biang.
Kumban shu pynkynmaw, ha ka sngi Saitjaiñ na ka liang ki nongïalam jong u Bah Teibor ki la ailad ïa ki paidbah naman la ki shnong jong ka Mawlai constituency kata haduh Mawiongrim ter ter haduh ki thaiñ kyndong jong ka Mawlai kata haduh ki bynta jong ka Mawsiatkhnam bad Umrynjah ba kin pynsngew ïa ka sur jong ki haba ïadei bad kane ka elekshon MDC.
Ha kane ka sngi, baroh ki nongkren ki la dawa bad pynbor beit ba u Bah Teibor u dei ban mih ïakhun beit kum u kyrtong shimet lada u kwah ba poi sha ka thong ha kane ka elekshon MDC kaban sa long shen ha u Rymphang mynta u snem.
