Kynnoh ba kyntait ka KHADC ban tip ba slem ka jingthep ka pisa T. 32 lak tam sha ka Council
Shillong, K’ Lyngkot 06: Ka Kaiphod u CAG ka la kynnoh ba ka Khasi Hills Autonomous District Council (KHADC) ka la kyntait ban ai ïa ki jingtip jong ki Ophisar kiba donkti halor ka jingslem ban leit thep ïa ka pisa ba T.32.94 lak jong ka Council, kaba lam sha ka jingbamklop ba shipor ïa ka pisa ha kane ka jaka treikam.
Katkum ka kaiphod ka Comptroller and Auditor General of India (CAG), la ong ba ka jingpynmih pisa jong ka Council ba T.32.94 lak ba la lum hapdeng u snem 2018-19 la thep hapoh ka Council Treasury hadien ka jingpynslem haduh 198 sngi.
“Ka jingslem ban leit thep ïa kane ka pisa ka Council ym tang ka dei kaba pynkheiñ ïa ka Fund Rules bad ka jingbat ïa ka pisa jong ka council ka lam sha ka jingbam klop ba shipor ïa ka pisa jong ka Council,” ka la ong.
“Ïa ki jingtip shaphang ki Ophisar ba donkti, watla la pan, ym shym la ai satia ban leh audit. Ka Council ka lah ban shim ïa ki sienjam ba ïahab ban tynrong ïa ka jingkitkhlieh halor ka jingpynslem ban leit thep ïa ka pisa ba T. 32.94 lak jong ka Council sha Tresury,” ong ka kaiphod.
Ka Rule 18 jong ka District Fund Rules, 1952 jong ka KHADC ka la ong ba baroh ka pisa kaba la iohpdiang da Cashier ha ka account jong ka Council dei ban phah sha ka treasury bad ym dei ban don kano kano ka account kaba dei ban pynlut.
Kaba phylla halor ka Rule ibid, katkum ka jingpynshisha kaba long lyngba ki receipt book/register bad ki Treasury remittance challan/bank deposit receipt ka pynpaw ba ka la don beit ka jingpynslem ban phah ïa ki khajna ba la lum da baroh ki tnat jong ka council ha ka snem 2018-19 haba ïadei ki No Objection Certificate, Land Record, Application Fee, Renewal Fee, Sale of stamp paper, affidavit bad kiwei kiwei.
Haba pdiang ïa ka jingshem ka kaiphod ba la audit, Secretary ka Executive Committee, KHADC la ong ha ka Nailar 2022 ba naduh u bnai Ïaïong 2022 ki jinglum ba manla u bnai la thep sha ki saving bank account jong ka Council hapoh ki sngi bakhatduh ki jingtreikam kaba ha kajuh ka bnai.