Shillong, Nohprah 04 : Ka Executive Committee ha KHADC hapoh ka jingïalam jong u Bah Pynïaid Sing Syiem ka lah ban duh noh ïa ka jingkyrshan jong ki 2 ngut ki MDC Congress hadien ba la phriang ki khubor ba ki nongïalam ka Congress ki la pynbor ïa kine ki arngut ba ki dei ban weng noh ïa ka jingïatrei lang ha ka Executive Committee ba ïalam da ka NPP.
Ki tyllong khubor ki la ïathuh ba na ka liang ka Congress la kham slem ka la bthah ïa kitei ki MDC ba ki dei ban weng noh ïa ka jingkyrshan na ka Executive Committee hynrei haduh mynta mynne kim pat weng satia.
La ïoh jingtip ruh ba katei ka jingdawa na ki nongtreikam ka party ka long ba kine ki arngut ki MDC ki dei ban weng noh ïa ka jingkyrshan la kumno kumno ha shwa ka Dorbar Tlang kaba dei ruh ka Dorbar ba khatduh mynta ka samoi lada jia ba ka elekshon MDC ka long noh ha u Rymphang jong u snem ban wan.
Wat na ka liang u President Rangbah jong ka Meghalaya Pradesh Congress Committee (MPCC), Bah Vincent H Pala ha ki khyndiat por ba la dep u la kubur ba ka la don ka jingdawa na ki nongïalam ka party ha ka jylla ba ki MDC ka Congress ki dei ban weng noh ïa ka jingkyrshan na ka EC.
Kumta, haba pyrshang ban ïa kren bad u MDC ka party na Mawkhar – Pynthorumkhrah, Bah Pynshngaiñ N Syiem u la kubur ba ka don shisha ka jingdawa na ki nongtrei ka party ba kum ki MDC ba kin weng noh ïa ka jingkyrshan na ka Executive Committee.
U Bah Pynshngaiñ uba bat ïa ka shuki Deputy CEM bad ruh kum u Working President ha ka party u la ong ba ïa kane ka mat kim lah satia ban shim rai mynta mynta khamtam haba ki la donlang ha ka EC baroh shi katta.
“Ia mynta hi ngam pat lah ban ong kumno kumno namar ngi don arngut ki MDC kumta ngi hap ban ïa syllok lang shwa bad u MLA/MDC na Mylliem Bah Ronnie V Lyngdoh ha shwa ban shim ïa ka rai ba khatduh,” u la ong.
Kumba long mynta hi, ka NPP marwei ka la don lypa haduh 16 ngut ki MDC bad kumta lada ka Congress ka weng noh ïa ka jingkyrshan ruh kan ym pat ktah ei ei ïa ka Executive Committee.
