Weng ka Mazdoor Union ïa ka jingïakhih ban sangeh pynpoi petrol sha Meghalaya

Nongpoh, Naiwieng 29: Hadien ka jingkulmar jingmut jong kiba bun ki paidbah ka jylla na ka jingbyrngem sangeh pynpoi petrol, diesel bad Gas sha ka jylla lyngba ka Northeast Petroleum Mazdoor Union (NEPMU) ka Sorkar Jylla ha ka sngi Balang ka la lum da ka jingïalang ha Circuit House Nongpoh ban ïakren na ka bynta ban pynthikna ba kan ym don ka jingkyrduh umphñiang ha ka jylla bad khamtam ban ïakren halor ka jingbyrngem sangeh pynpoi umphñiang sha ka jylla.
Ha ka jingïalang ba la khlieh da u Commissioner & Secretary ka tnad Food and Civil Supplies ka sorkar jylla u Pravin Bakshi la donlang u Additional Deputy Commissioner jong ka Ri-Bhoi u Bah MB Tongper, u heh Pulit ka East Khasi Hills u K. Prasad, u Additional Superintendent of Police u Bah B. Diengngan, u General Secretary jong ka North East Petroleum Mazdoor Union u Ramen Das, u President jong ka Petroleum Dealers Association of Meghalaya u Bah Kennedy C Khyriem, u President jong ka Meghalaya Indane Distributor Association u Bah RL Blah bad ki ophisar na ka tnad Food and Civil Supplies ryngkat ki trai Petrol Pump.
Kum ban shu pynkynmaw hangne ba ki Pulit ka Crime Branch ki la hiar sha Ri-Bhoi ha ka 24 tarik mynta u bnai ban khynra naphang ïa ki jaka ba la suba ba ka don ka jingkhaïi tuh ïa ka umphñiang ha ki jaka bapher bapher ha ka thaiñ 22 mer bad ki la kem ruh kumba 14 ngut ki briew ba la suba donkti ha kane ka kam. Kane ka jingjia ka la pynlong ïa ka NEPMU ban kynnoh ba ki Pulit ki la leh palat pud ïa ki nongñiah kali kit umphñiang wat kiba dang ïeng bamja ha ki Dhaba bad phah ruh da ka ujor sha ka Sorkar.
Hadien ka jingïalang u Pravin Bakshi u la ong, ha kaba ïadei bad ka jingkhynra jong ki Pulit dang shen, ai ba ka aiñ kan leh ïa kaba donkam namarba ki Pulit ki dang pynlong ka jingtohkit hynrei kam dei ban don kano kano ka jingthud ha ka jingpynpoi petrol sha ka jylla bad ba ki paidbah kim dei ban khuslai lane ban khih khohreh, namarba kam don ka jingsangeh pynpoi petrol sha ka jylla.
“Kumba ki Pulit ki la leh ïa kaba donkam katkum ka aiñ halor ka jingkhaïi tuh ïa ka umphñiang Petrol, la ïoh ruh ban ïakren ba kam dei pat ban don kano kano ka jingpynngat ïa kiba luilui kiba pyndep ïa la ka kamram ban pynpoi Petrol sha ka jylla,” la ong u Pravin Bakshi da kaba bynrap ruh ba ka tnad Pulit lyngba ka tnad Crime Branch kan leh ïa kaba donkam ban pynlong ka jingtohkit.
Ha kaba ïadei bad ka jingkhohreh ki paidbah ban leit thep Petrol bad ban ïeng laiñ ha ki petrol pump u Pravin Bakshi u la ong, “kaei kaba la lah ban ïakren ha kane ka sngi la lah ban poi sha ka jingïasngewthuh jingmut bad kam dei ban don kano kano ka jingthud bad ka jingsngewthuh bakla sha ki paidbah namar ka umphñiang ka bun ha ka jylla bad lyngba kane ka jingïakynduh ka la poi noh sha ka jingïasngewthuh jingmut ha kaba ka Union ruh ka la rai ruh ban weng noh ïa ka jingïakhih.