Trei ban pynkhlaiñ ïa ka Party shwa ka Election MP bad MDC; bthah u President ïa ki nongïalam

Shillong, Naiwieng 29 : Ban pynkhlaiñ ïa ka Party naduh nalor haduh ha trai ka National Peoples Party (NPP) ka la thaw da ki Committee naduh ki Block Level, District Level bad haduh ka Sate Committee bad ka thong ka long ban wanrah ka jingjop don burom ïa ki kyrtong jongka party ha ka election MP bad MDC. Na ka liang u President jongka Party ha kane ka jylla uba dei ruh u Symbud Myntri Rangbah u bah Prestone Tynsong u la banjur ïa ki Nongïalam ka Party bad ïa baroh ki dkhot ba kin trei shitom bad shitrhem naduh mynta khnang ban ïoh kheit ïa u soh jong ka jingkmen ha kitei ki election.
Haba kren ha ki lad pathai khubor u nongpathai khubor jongka NPP u bah H.M Shangpliang uba dei u MLA ba rim ka Mawsynram u la ong “ Ka thong jongka jingthaw ïa kine ki Committee naduh Block, District haduh State ka long ban pynkhlaiñ ïa ka party namar kumba phi la ïohi kumno ka NPP ka pynkhreh nadong shadong ban pynkhlaiñ ïa ka party da kaba thung ïa ki dkhot ki ban ïalam ha ka jylla, nangta ïa ka State Commitee ruh la dep thung da u President ka Party. Kine ki Committee kin pynkhlaiñ ïa ka party naduh trai haduh sha khlieh duh” ong u bah Shangpliang.
U la ong ba ka NPP kumba long mynta ka la pynkhreh tyngeh ban ïakhun ïa ki ar tylli ki election kata ka election MP bad MDC ki ban long ha u 2024.
Shuh shuh u President ka National People’s Party (NPP) hapoh ka jylla u bah Prestone Tynsong mynta ka sngi ka la sam ïa ki shithi thungkam ïa ki District President ba thymmai jong ki District hapoh ka Rilum Khasi bad Jaintia.
U Bah H.M Shangpliang ula ïathuh ba ka Party ka la thung haduh 7 ngut ki President thymmai jong ki District hapoh ka Rilum Khasi bad Jaintia Hills.
Kine ki long u Bah Seiborlang Shadap kum u President ka East Jaintia Hills District, Octomewat Lamin President ka West Jainti Hills, Teibor Pathaw President ka Shillong City, Macmilan Byrsat President West Khasi Hills, Biolinda Nonglait President Eastern West Khasi Hills, Clement Mawlong President Ri-bhoi District bad u Bah Gavin Mylliemngap kum u President ka East Khasi Hills District, pyntip u bah H.M Shangpliang.
U Bah H.M Shangpliang ula ïathuh ba ia kine ki 7 ngut ki President thymmai jong ki District hapoh ka Rilum Khasi bad Jaintia Hills la shim rai ha ka jingïalang ba la wan shim bynta lang da baroh ki Wokring President jong ki District ïa kaba la pynïaid da u State President ka NPP u Bah Prestone Tynsong uba dei ruh u Symbud Myntri Rangbah ka Jylla.
Ula ïathuh ba ïa ki President thymmai jong ki District hapoh ka Rilum Garo Hills yn sa pynbna ha ki sngi ban wan da u State President ha ka jingiatreilang bad u Working President ka Party ba khmih ïa ka Garo Hills.
“U State President ula kyntu ïa ki District President ba thymmai ban thaw ïa ki District Committee ha kaba ki dkhot kin kynthup lang ki ba bat kam hapoh ka Party haka jingdon lang ki dkhot barim jong ki Committee” ula ong.
U Nongaiktien ka NPP ula pyntip ba hadien bala thaw ïa ki District Committee, yn thaw sa ïa ki Block Level ban sdang trei ïa ki kam ha man la ki shnong na ka bynta ban pynkhlaiñ ïa ka Party.
“U State President ula kyntu ïa ki District President ba thymmai ba ki dei ban phah iaki jingtyrwa ha lane shuwa ka 20 tarik Nohprah ban pynlong ïa ka jingïalang jong ka State Level Committee bad ha kane ka jingïalang yn sa pdiang ruh ïa ki kaiphod jong baroh ki Committee ha ka jingdonlang u National President ka NPP u ba dei ruh u Myntri Rangbah ka Jylla u Conrad K Sangma” ula ong.