Shillong, Naiwieng 29 : U Myntri Rangbah ka jylla, Conrad K Sangma ha ka sngi Balang u la pyntip ba ka sorkar jylla ha ka review meeting kaba long ha katei ka janmiet ka la shim ïa ka rai ban phah maramot noh mardor ïa ki bynta jong ka surok Shillong – Dawki kiba la sniew shaba palat pud.
Haba kren bad ki lad pathai khubor hadien ka jingïalang u Myntri Rangbah u la ong, “Don ki bynta jong ka surok khamtam shwa ban poi sha Dawki kiba la sniew palat, kumta ngi la hap ban leh kyrkieh khnang ba ka jingmaramot ïa ka phase – 4 ba kan sdang noh kham kloi.”
U Myntri Rangbah u la ïathuh ruh ba na ka liang ka NHIDCL ka la pyntikna ïa kane ba ka jingmaramot kan sdang noh shen ha kine ki khyndiat sngi ban wan bad ruh ban pyntikna ba ka rukom trei kan long kaba janai.
“Hynrei katba ka jingmaramot ka dang ïaid ka jingpyntrei ïa ka surok thymmai ruh kan ïaid lang ryngkat ryngkat,” bynrap biang u Myntri Rangbah.
Ha kajuh ka por, u la pyntip ruh ba ïa ka phase -1 jong ka projek la dep ban aiti ban pyntrei noh ha u kontraktor bad kumta na ka liang ka sorkar ka khmih lynti ba un sdang noh shen ïa ka kam.
“Ki la sdang ban lum ïa ki mashin bad ki nongtrei bad kumta ngi kyrmen ba ha kine ki shi taiew lane 10 sngi kin sa lah ban sdang noh ïa ka kam naduh Umshyrpi ter ter sha 7 Mer bad shaneng.”
La ïathuh ruh ba ha katei ka review meeting ka mat kaba ki ïakren ka long ban pyntikna ban sdang noh ïa ka jingmaramot bad kaba ar pat ka long ba ïa ka kam kaba la dep aiti ha ki kontraktor ba kin sdang noh kham kloi ïa ka kam.
Shuh shuh u ong ruh ba ha ka jingpyntrei ïa katei ka surok ki don la ki jong ki jingeh ba ki kynduh kynthup naduh ka jingpynkynriah jaka, ka jingshim jaka na ki paidbah bad khamtam eh na ka ïaid ka ieng jong ki kali. U ong ruh ba kum ka sorkar ki kwah ban pyntikna ba baroh ki kam kin ïaid beit ha baroh saw tylli ki phase bad ba ka NHIDCL ryngkat ki kontraktor kin shimkhia ïa ka kam.
