Wat shu thnum tang na ïing ne ha ki social media, mih sha madan ban dawa ïa ka hok: Londonner

Shillong, Ïaiong 22: U Bah Londonner M Sohtun uba dei u dkhot bad u nongkit kam jong ka Voice of the People Party (VPP) u la pynpaw ba ka jingleh kyllut ka sorkar jylla kala pynlong biang ïa ka VPP ban mih madan ban ïakhih bad kane baroh kadei namar ka jingset kyllut ïa ki jingdawa u paidbah.
Haba kren ha ka jingialang paidbah kaba la pynlong da ka VPP ha Motphran mynta ka sngi u Bah Sohtun u la ong ha kaba ïadei bad ka jingeh jong ki khun samla ha ka ioh kam ioh jam, ka por kala dei ka por ba kin sangeh ban thnum na ïing ne ha ki rynsan social media hynrei ban mih sha madan ban dawa ia ka hok.
U Bah Sohtun u la ong ba ka sorkar ha kine ki khyndiat sngi ka sorkar kala pyndem ha khmat ki paidbah ba shong shah thngan ki samla namar ka dewlynnong Lumpongdeng.
“Kane kadei ka ri synshar paidbah bad ka bor ka shong ha u paidbah ban pynkiew ne pynhiar bad ki paidbah ruh kidei ban sngewthuh ïa la ka jong ka bor” ong u Bah Sohtun.
Shuh shuh ha ba kren halor ki kam pynroi ha ka tnad kam jngohkai pyrthei u Bah Sohtun u la ong ba um shym la iohi ba ka project ha Lumpongdeng kan pynmyntoi ïa ki paidbah hynrei kan ai jingmyntoi tang ïa ki heh spah.
Ha kaba ïadei bad ki scheme u Bah Sohtun u la ong, kiba ioh jingmyntoi ia ki scheme ki dei tang ki briew kiba don ka jingiadei bad ka sorkar bad bynrap ruh ba kim pyrshah ïa ka kam pynroi hynrei ki pyrshah ïa ka jingbym ioh ki paidbah hynrei ioh jingmyntoi da ki heh spah.
Na ka liang u Bah Janbas Pakma uba dei u MDC na JHADC u la ong ba naduh ba khang ka NGT ia ka kam tih dewiong kala wanrah jingeh ba khraw ïa ki paidbah kiba ju im sngi da ka kam dewiong hynrei ka jingkhang kala ktah bha ïa ka ioh ka kot.
“Hapdeng ka jingkhang ka NGT ban tih ïa u dewiong, hynrei jling shi jling kylla ki trok kit dewiong bad kine baroh kidei kiba don ka jingiadei bad ka sorkar” u la ong bad bynrap ruh “Lada khang, khang lud ïa baroh bad lada plie plie lang ïa baroh”.