Ai noh ka NOC ban ïoh shna surok PMGSY ha khappud, bthah ka sorkar ïa ka CPWD bad BSF

Shillong, Ïaiong 22 : U Symbud Myntri Rangbah ka Jylla, Bah Prestone Tynsong ha ka sngi Balang u la bthah ïa ka Central Public Works Department (CPWD) kumjuh ïa ka Border Security Force (BSF) ba kin ai ïa ka No Objection Certificates (NOC) na ka bynta ban shna ïa ka surok PMGSY-III ha ki khappud jong ka jylla bad ka Bangladesh.
Ïa kane ka rai u la ïathuh hadien ka jingïalang kaba la donlang naduh ki heh BSF bad kumjuh na ka CPWD. Katkum ka jingong jong u Symbud Myntri Rangbah, kawei na ki jaka ka dei ha ki thain Ranikor ha kaba ka surok ka hap ha ka CPWD bad BSF.
U la ïathuh ba ka la don ka jingmang tyngka na ka bynta ban shna biang ïa kine ki surok hynrei ki donkam pat ïa ka ‘no objection certificate’ na ka CPWD bad kumjuh na ki BSF.
U Symbud Myntri Rangbah u la ïathuh ruh ba kawei pat ka ishu ka dei ha rilum Garo ha kaba ki don ki bynta jong ka surok kiba don shabar jong ka jingker sainar shiah.
“Ïa kum kine ki bynta kiba don shabar jong ka jingker sainar shiah ym hapoh ka jingker, ki BSF ki sngew ba donkam ïangi ban pynbeit ïa ka surok bad pynpoi ïa ki shapoh ka jingker namar lada leit shabar jong ka jingker na ka Bangladesh ki pyrshah bad kin ym ailad ïangi ban shna surok lane kino kino ki jingtei,” u la ong.
U Bah Prestone u ong ruh ba kane ka ishu la ïa kren ha katei ka jingïalang bad la bthah ruh ïa baroh, kata ïa ka CPWD bad BSF ba kin ai noh ïa ki NOC khnang ba ka kam kan sdang noh mardor.