Wat sheptieng ïa ki jingbyrngem bad pynsmiej ka VPP ko phi ki Dorbar Shnong bad Khlieh Nongsynshar kyntu u Dy CM

Shillong, Rymphang 09 : U President ka National People’s Party (NPP) bad Symbud Myntri Rangbah ka jylla U Bah Prestone Tynsong ha ka miet Sngi Saitjain, ula kyntu ïa ki Dorbar Shnong bad ki Khlieh Nongsynshar Shnong ba kim dei ban sheptieng ïa ka jingshah byrngem bad pynsmiej ba dang shen ha kawei ka seng saiñ pyrthei (VPP) namar ki dei kiba la pynkupbor da ki aiñ jong ki Autonomous District Council (ADC).
Ula khyrwit ïa kane na ka rynsan ïalap elekshon ha Nongkynrih,Laitlyngkot, ban pan jingkyrshan ïa la u jong u pyrsa bad kyrtong ka NPP na Langkyrdem-Laitkroh constituency u samla Rahboklang Tynsong.
U Bah Prestone ula ong ba ka don ka seng saiñ pyrthei kiba la byrngem ban tan ïa ki Khlieh Nongsynshar Shnong (Rangbah Shnong) sha ïing Bishar tang namar ba kim shym la ai jingbit ban pynlong ïa ki jingïalang paidbah ban ïalap elekshon.
“Nga sngew synei ïa baroh ki Rangbah Shnong hynrei nga ong ha phi ba ka Aiñ ka don ban ïada ïa phi, sngewbha ban ym sheptieng namar phi dei kiba la ïoh bor pura na ki District Council” ula bynrap.
Haba kren ïa ka jingjia ha Mawlai, u Bah Prestone ula ong “Nga pang ka dohnud haba nga peit ïa ka Mawlai Town Dorbar (MTD). Hadien ka jingïohpdiang ïa ki jingujor na ki Kmie Kpa bad ki samla pule, ki hynriew ngut ki kyrtong (na Mawlai) ha ryngkat bad ka MTD kila ïarai lang ban nym pynlong ïa ki jingïalang paidbah naba kan pynthut ïa ki samla pule, kiba dang pynkhreh ïa ki eksamin bapher bapher hynrei ban pynlong beit da ka Common Platform kata ban kren beit baroh ki kyrtong na kajuh ka rynsan. Hynrei sngewsih, ïa kane la pynbud da ki jingbyrngem ha ka sngi kaba bud. U nud ban byrngem kat ïa ki Khlieh Nongsynshar Shnong ne ki Bor Synshar Shnong ki bym shym la ïoh wat ïa ka jingsiew na ka bynta jingshakri paidbah jongki”.
Haba thalaiñ tyngeh ïa ka jingthmu ban ujor ejahar pyrshah ïa ki Rangbah Shnong, une u Nongïalam ka NPP ula ong “Sangeh ka jingkdew kti jong phi ïa kiwei, peit shuwa ïala ki jong ki jingduna”.
“Nga kyrpad ïa ki paidbah ka Nongkynrih-Laitlyngkot ba kim dei ban shah pynbiej ha kum kane ka party” ula ong.
U Bah Prestone ula ai ka jingïaroh ruh ïa ka KHADC bad ong “Ngi la nang aibor ïa ki Seng Kynthei bad Seng Samla hapoh ki Shnong. Kane ka Aiñ ka dei kaba la thaw da u CEM ba mynta Bah Pyniaid Sing Syiem ha ryngkat ka jingïasyllok bad nga lem bad ki Ophisar jong ka Sorkar Jylla”.
Haba kam ba ka Sorkar ba la lam khmat da ka NPP ka la pynbha bad shna ruh bun bah ki surok hapoh ka Jylla , u Bah Prestone ula ong “Kane ka pyni ïa ka jingieid ba shisha ïa ka Jaidbynriew ym kum kito kiba nang tang ban shu kular katba hala ki jong ki constituency, ka jinglong jingman ki surok kim I long shuh wat tangban ïaid ki kali kulai. Kumta, ki paidbah kim dei ban shu ngop ha ki jingpynbiej jong kane ka party kaba heh tang ka tyngam khlem ka kam”.
Ula kular ruh ba ka NPP kan pynthikna ban ai ka jingïada kaba pura ïa ka hok bad ki jingmyntoi jong ki paid riewlum trai muluk lyngba ki District Council.
“Kane ka elekshon ka long kaba kongsan bha. Ki don shibun ki aiñ kiba ngi kwah ban wanrah lyngba ki District Council ban nangpynkhlaiñ bad pynshngaiñ ïa ka lawei jong ki paid riewlum trai muluk” ong u Bah Prestone.