Shillong Nohprah 19: Ka Khasi Students’ Union lyngba ka Employment Monitoring Cell ka la phah ïa ka shithi sha u Bah D.P Wahlang, IAS, Chief Secretary jong ka jylla Meghalaya halor ka jingbym shaniah ïa ka result jong ka main ka eksam MCS bad ka jingpynslem bad ka jingkynrum ha ka post typist.
Ka Seng ka la ïathuh ba ha kine ki khyndiat bnai ba la dep ka la ïakhih ban pynbor ïa ka MPSC ba kan pynmih ïa ki marks jong ka Prelim jong ka MCS bad halor kiwei kiwei ki mat. Hadien ba ka MPSC ka la pyndem tdong bad pynlait ïa ki marks la ïohi shibun tylli ki jingbakla.
Ka Seng ka lah phah ruh ïa ki 20 tylli ki mat jingdawa sha ka Sorkar ban pynthymmai ïa ka rukom treikam ha ka MPSC bad na ka liang ka Sorkar ka la thaw ïa ka Committee ka ban lamkhmat da u Bah F. R. Kharkongor bad kiwei bad kane ka Committee kan shong ban bishar bad ban pynbeit ïa ka rukom treikam bad kan ai ïa ka kaiphod ne report ka jong ka ha lane shuwa ka 30 tarik u Kyllalyngkot, 2025.
“Hynrei katba ka Committee ka dang shong pyrkhat, ka MPSC ruh ka la pyndep wut wut ïa ki eksam da kaba leh bor ban pynkhiud bad tap eit miaw ïa ka jingbamsap ka jong ka. Ïa kane lah ban pynshisha da ka result MCS.
Ka MPSC ka la pynmih ïa ka result jong kiba ïaleh ïa ka main jong ka MCS ha 6 tarik u Nohprah, 2024. Ha kane ka resot la ïohi ba 9 ngut na kita ki additional list ki la pass ïa ka eksam. Ki candidate ba ïaleh ïa kane ka eksam ki pynsngew ba ka long kaba sngewphylla ba tang hapoh katto katne bnai ba ki ïoh por ban pynkhreh ïa ka eksamin, kine ki lah ban pass ïa kane ka eksam hynrei kito 580 ngut pat ki bun kiba khlem pass bad ka jingbym pynlait ïa ki marks ka pynartatien ïa ki nongthoh eksamin ba ka lah ban don eiei sha lyndet,” ong ka kyrwoh na ka KSU.
Ka seng ka la ïoh shibun tylli ki jingujor halor kane ka bynta. Ki candidate ki lah batai sha ka seng ba haba ki leit shapoh ka MPSC ban tip ïa ka marks ka jong ki bad ban pan ïa ka cutoff marks, kim shym la lah ban ïoh satia ïa kata. Don napdeng jong ki ba lah file ïa ka RTI ruh, hynrei ka MPSC kam shim ïa ka application ka jong ki bad don kiba shah byrngem ruh ba ki thoh RTI. Don na ki candidate kiba pyneh ïa ka MPSC halor ka jingbym shim ïa ka RTI bad kum ïa kita ka pdiang hynrei ka phah ïa ki ba kin ym bit ban buh ïa ka jingkylli kaba kam lah ban jubab bad ka ong ruh sha ki ba kan jubab ïa ka RTI ynda la dep ka personal interview.
“Kine ki jingleh na ka liang ka MPSC ka pynshan khmat ïa ka seng ba ka don kaei kaei sha lyndet ba ka MPSC ka ïaleh ban buhrieh. Shuh shuh balei ba la salia ban pynmih ïa ki marks, ka MPSC kam lah ban rieh halor ka daw ba da kaba pynmih ïa ki marks kan ktah ïa ka personal interview namar kane ka eksam kam dei shuh tang na bynta kito ki candidate kiba ïaleh hynrei ïa baroh ki samla wad kam ban don ïa ka jingshaniah ba ka thungkam thungjam ka long kaba khuid,” ong biang ka KSU.
Kumta ka seng ka dawa ba dei ban pynlait paidbah ïa ki marks bad ïa ka cutoff bad ki samla ki dei ban ïoh peit ïa ka answer script ka jong ki.
Shuh shuh halor ka post Typist (HOD) ba la don bun tylli ki snem ba ka MPSC kam shym la lah ban pynmih ïa ka result ka long kaei kaei kaba pynpaw ïa ka jingbamsap napoh napoh ban thep ïa ki briew jong ki heh ki haiñ. Ka MPSC ka pynkylla ruh wat ïa ki aiñ ba la don lypa halor kumno ban thep ïa ka kam.
“Kumta ka seng ka dawa ba ka recruitment process na bynta ki Typist ka dei ban ïaid beit thik katkum ka Meghalaya Directorate Establishment (Ministerial) Service Rules, 2010. Ka Seng ka kyntu ruh ïa u Chief Secretary ba un shimkhia halor kane ka bynta ban pynbeit ïa kine ki jingkynrum kynram jong ka MPSC bad kam shym kwah ban ïa kren bad ka MPSC namar latip shai ba ka long kaba bamsap bad katba pat lah ban pynthymmai ïa ka rukom treikam jong ka, kan ym myntoi ïa ka seng ban ïakren halor kano kano ka mat namar ka nym seisoh. Hynrei lada ka MPSC kam pynbeit ïa kine ki jingujor haneng, ka seng kan shim ïa ka sienjam kaba kham tyngeh,” ong ka kyrwoh na ka Employment Monitoring Cell ka KSU CEC.
