Shillong, Nohprah 19 : Ka Dorbar Tlang jong ka KHADC kaba sdang ha kane ka sngi Palei ka la kynmaw burom ïa ki MDC kiba la khlad noh mynta u snem, kata kynthup ïa u CEM barim bad MDC ka Nongthymmai Bah Latiplang Kharkongor bad ruh ïa ki arngut ki MDC ba rim kata u Bah Hadrian Lyngdoh na Mawkyrwat constituency bad Bah DP Ïangjuh uba la mih khmat ïa ka Mawsynram constituency.
Haba shim bynta ha katei ka jingkynmaw burom ïa kine ki MDC ba la khlad noh, u CEM ka KHADC, Bah Pynïaid Sing Syiem u la ong ba ka jingkhlad noh jong kine ki nongïalam ka la long ka jingduh kaba khraw ïa ka Council.
“Ka jingkhlad noh jong kine ki nongïalam ka Council ka la wanrah ïa ka jingsngew thylli,” u la ong.
Na ka liang u CEM u la pynpaw ba u kwah ruh ban phah ïa kane ka jingsngewlem sha ki bahaiing ha sem jong kitei ki nongïalam.
Haba shim bynta lang ha ka jingkynmaw burom ïa kine ki MDC, u Nongïalam ka Liang Pyrshah Bah Titos W Chyne u la ong ba lada peit na ki jingthoh kynmaw burom, ka paw ba kine ki MDC ki dei kiba pawkhmat bha ha ka por ba ki dang long kum ki nongmihkhmat paidbah.
U Bah Titos u ong ruh ba u Bah Latiplang uba la ïoh ruh ban bat kum u CEM ka KHADC u la long u briew uba jai jai bad u nongïalam uba don bha ka jingpyrkhat na ka bynta ki paidbah jong ka constituency.
