Shillong, Nohprah, 19: Ka Congress ha ka sngi Palei ka la pynbna ïa ka thup kyrteng ba nyngkong jong ki 26 ki kyrtong ki ban aireng ha ka elekshon MDC sha ki ar tylli ki Autonomous District Councils (ADC) rilum Khasi bad Jaiñtia, ka ban sa long ha ka 21 tarik, Rymphang, 2025.
Ka party ka la mynjur ïa ka kyrteng jong ki 15 ngut ki kyrtong na rilum Khasi bad 11 ngut na rilum Jaiñtia, hadien ka jingbishar kaba bniah da kaba pan jingmut na ka Block Congress Committee (BCC), ka District Congress Committees (DSC), bad na ka Pradesh Election Committee (PEC), la ong ka Congress ha u kyrwoh.
“Ki kyrtong ba la shah jied ki dei ki riewthymmai, kiba la biang ka kyrdan pule, kiba la shah hikai pyntbit kumno ban pyntyllun ïa ka kamram ynda la bynshet ha ka tyrpeng jong ki. Kine ki jingpynkhreh ki long ki jingangnud jong ka Congress ban wanrah ïa ki nongïalam kiba tbit bad kiba shlur, kiba aiti lut na ka bynta ka bha ka miat bad ki jingangnud jong ki paidbah ka Meghalaya,” ong ka party haba bynrap “katba ngi nang jan sha ka elekshon, ngi kyrpad ïa ki nongthep vote jong ka ri Khasi bad Jaiñtia ban buh ïa ka jingshaniah ha ka Congress bad ha ki kyrtong jong ngi. Ka party ka dang ïai bteng ban ïada ïa ki kyndon jong ka Sixth Schedule bad ban pynneh ïa ka hok bad jingmyntoi jong ki jaidbynriew riewlum.”
“Ngi ngeit ba ki paidbah nongshong shnong ka jylla Meghalaya kin ai ïa ka rai kaba shai sha ka Congress, kaba pynlah ïa ngi ban bteng na ka bynta ban pyntyllun ïa ka mishon jong ngi, ka roi ka par bad ka hok ïa baroh,” la bynrap ka Congress.
Ki 15 ngut ki kyrtong na ka bynta ka elekshon KHADC ki kynthup ïa u Dominic Mynsong na Mawhati, Rocky A Marwein na Umsning, Jonathan Syiem na Sohryngkham, Hilarius Warbah na Mawkynrew, Astarland Khyllep na Shella, Banphiralang Basaïawmoit na Mylliem, Allan Victor Lyngdoh na Nongthymmai, Manuel Badwar na Laitumkhrah-Malki, Pynshngaiñlang Syiem na Mawkhar-Pynthorumkhrah, Gerald Shullai na Jaïaw-Mawprem, Wanseng Jyrwa na Mawlai, Nathaniel Rymmai na Nongspung-Sohiong, Lawanpynshngaiñ War na Mairang-Nongkhlaw, Bormanding Nonglang na Rambrai Jyrngam bad Medal Sing Lyngdoh na Mawkyrwat.
Ki 11 ngut ki kyrtong na ka bynta ka elekshon JHADC ki long u Romeo Lyngdoh na War Central, Madonbai Rymbai na Amwi-Khliehtyrchi, Jona Rynjah na Moodymmai-Nongkhroh, Pyrkhatbha Pyrphet na Mynsngat-Khanduli, Banikas Laban na Barato-Mukroh, Rikut Parien na Saphai-Sahsniang, Welpard Suchiang na Raliang, J. Treilang Suchiang na Shangpung, Yooniki Phawa na Muthlong Sohkynphor, Siril Suja na Sutnga Nongkhlieh bad u Grimlang Dkhar na Narpuh.
