Ka Sorkar kam dei ban shu ai kyllum hajuh ïa ka bhah sha ki District Council: Bah Titos

Shillong, Nohprah 19 : U Nongïalam ka Liang Pyrshah ha KHADC, Bah Titos W Chyne u la ong ba ka sorkar jylla kam dei satia ban shu ai kyllum lang hajuh ïa ki bhah ba ka Council kadei ban ïoh na ka sorkar jylla.
“Ngi kwah ba ka sorkar jylla ba kadei ban da kdew shai katno ka khajna ka ïoh lum haba ïadei bad ka bhah ba ka KHADC kadei ban ïoh,” u la ong ha ka sngi sdang jong ka Dorbar Tlang ha kane ka sngi Palei.
Shuh shuh u ong ruh ba ïa kine ki bhah ka sorkar kam dei satia ban shu ai kyllum lang hynrei kum ka Council kadei ban tip katno ka jylla ka ïoh ïa ka khajna na ki marpoh khyndew bad kiwei kiwei.
Shwa kane, u CEM, Bah Pynïaid Sing Syiem haba jubab halor ka jingkylli ba wanrah da u Nongïalam ka Liang Pyrshah u la pyntip ba ka Council haduh u bnai Naiwieng 2024 ka la ïoh pdiang 38.22 klur tyngka ka bhah na ki tnad lum khajna bapher bapher.
Na ka liang u CEM haba jubab halor ka jingkylli u la ong ba rukom ïoh bhah jong ka Council na ka sorkar jylla ka long ar bynta, kata ïa ka bhah haba ïadei bad ki motor vehicle ka ïoh 75 persen, katba na ki marpoh khyndew (major mineral) kata kum u dewiong bad kiwei kiwei ka ïoh 25 persen.
U Bah Pynïaid u la ong ruh ba na kane ka bhah ba ki ïoh 4 klur tam la bat noh da ka sorkar jylla na kabynta ban pyntyllun ïa ka elekshon.
Ha kajuh ka por u MDC ka Laban – Mawprem, Bah Mitchel Wankhar u la buh jingkylli la ka Council ka ïoh khajna neem na ki jingïakob khwai dohkha khamtam haba ki khusnam ïa kiba jop ka la long kaba heh haduh da ki kali ne ki JCB ruh.
Halor kane ruh, u CEM u la pyntip ba haduh mynta ka Council ka dang don tang ïa ka Principal Act bad ka Amendment 2023. Tangba u ong pat ba la aibor ha ki ban shna ïa ki Rules kiban teh lakam naduh ban pynneh pynsah ïa ki wah bad ki dohum dohwah, nangta ban aibor ha ki khlieh nongsynshar ban tehlakam ïa kine baroh.
U CEM u la pyntip ruh ba kine kin sa rung lang wat haba ïadei bad kane ka ishu khwai dohkha kumjuh khamtam haba ki la ïoh pdïang bun ki jingthoh ba dei ban leh ei ei halor kane ka bynta.