Don ki poiwir Bangladeshi kiba don jingïadei bad ki lehnoh, ka jingma ïa ka Meghalaya: HYDC

Shillong, Nohprah, 19: Ka Hynñiewtrep Youth Development Council (HYDC) ha ka sngi Palei ka la ujor sha ka Director General of Police ka Jylla ka Kong Idashisha Nongrang da kaba kyntu ïa ka tnat Pulit ba kan khynra naphang ïa ki poiwir Bangladeshi kiba wan rung be-aiñ sha Meghalaya bad ban pynphai biang ïa ki sha ka ri Bangladesh.
Ha ka jingïakren bad ki lad pathai khubor u President ka seng u Bah Wyraiwan Sohtun u la ong, “ngi sngewkhia haduh katta katta ïa ka jingdon jong ki poiwir Bangladeshi ha ka shnong Ladrymbai bad ha ka shnong Sookilo, Jaiñtia Hills bad ha ki katto katne ki bynta ka sor Shillong kiba lah ban buh jingma ïa kane ka jylla jong ngi.
“Dang shen ngi ïohi ïa ka khubor ba ki shipai ba la shongthait ka ri Bangladesh ki la byrngem ban hiar thma ïa ka ri India. Ka Jylla Meghalaya ka dei ka bynta jong ka ri India bad ki poiwir Bangladeshi ki lah ban wan hiar thma bad kane kan buh jingma ïa ka jylla jong ngi,” ong u Bah Sohtun.
“Ngi la pynpaw hakhmat ka DGP bad ngi la pyni ba ka don ka jingma kaba khraw katba ka tnat Pulit bad ka Sorkar Jylla kim pat lah ban shimkhia ban peit bniah ïa kine ki mynder kiba rung tuh sha ka Jylla bad kiba buhai shnong khlem da ïaid ïa ki kyndon aiñ,” u la bynrap.
“Ngi la ïakren bad ka DGP ba ka ladei ka por ïa ka tnat Pulit ban talasi, ban bat bad ban kem ïa ki poiwir Bangladeshi ha kane ka ri bad ban beh sha ri Bangladesh. Ngi la ong ïa ka DGP ba ki don ki briew sha khappud kiba pyrshang ban pynrung tuh ïa ki mynder Bangladeshi bad ïa kata la lah ban pynshisha bad la kem ruh ïa kiba pynrung tuh ïa ki mynder Bangladeshi” u la ong shuh shuh.
U nongïalam ka HYDC u la kam ba ki don ki mynder Bangladeshi kiba don ka jingïadei bad ki lehnoh na ka ri Bangladesh bad kane ka buh jingma ïa ka jaidbyniew. “Lada ka poi shisha kata ka por ban hap ïaleh thma ka ri India bad ri Bangladesh, kine ki poiwir Bangladeshi kiba don hangne kiba don jingïadei bad ki lehnoh na Bangladesh kan jia aiu ïa ka jaidbynriew jong ngi,” u la ong.
“Ngi long ki ka jaidbyniew ba khuslai bad ngi kyrpad ïa ka tnat Pulit ba ki dei ban lehnoh mardor bad ban wad ïa ki poiwir Bangladeshhi kiba wan buhai shnong khlem ki kot ki sla kiba bad ban beh noh ïa ki na Meghalaya sha ka ri Bangladesh khnang ba ngin ïoh ïa ka shongsuk shongsaiñ,” la kyntu u President ka HYDC ïa ka tnat Pulit.
“Ka DGP ka la pan ïa ka jingïatreilang bad kaei ka jingtip ba ngi ïoh ngin ai sha i bad ka aiñ kan shim katkum ba la bthah ha ka riti synshar ka ri,” la pyntip u Bah Sohtun.
Ka seng ka la kyntu ruh ïa ka DGP ban pynmih ïa ka hukum kaba bthah ïa ki Rangbah Shnong ban lum jingtip kaba bniah shaphang ki nongshong wai ha u pud u sam jong ka shnong jong ki. Ba ki trai iing ki dei ban lum bad aiti ïa ki dulir jong ki nongshong wai bar jylla hapoh ka por ba la buh. Ban pynthikna ba lada lap ïa kino kino ki briew khlem ki kot ki sla kiba biang dei ban leh da kaba tyngeh katkum ka aiñ.
“Ngi nget ba lyngba kane ka sienjam kan ïarap ban khanglad ïa ki jingjia bym lah ban poi pyrkhat bad ban pynkhlaiñ ïa ka shongshngaiñ ha kane ka thaiñ. Namar ka jinglait rynghang ka khappud hapdeng ka India bad Bangladesh, ka long kaba donkam eh ban phikir bad ban leh eiei noh mardor,” la bynrap shuh shuh ka Seng.