Shillong, Risaw 29 : Ka Nangkiew Irat SC watla ka ïalehkai tang 10 ngut hynrei ka la ïoh pat ban leit phai iing da ka jingkmen hadien ba ka la ïoh pat ban pynliem ïa ka Langsning FC da 3-1 kol ha ka lympung ïalehkai jong ka Shillong Premier League 2024 kaba long ha madan SSA Stadium, First Ground Polo.
Ha ka jingïakhun, dei ka Langsning kaba ïoh ban pynkhih jar nyngkong tang ha ka minit kaba 17 jong ka kylla step lyngba u Dauruhi Pale. Hynrei dei tang ha ka minit kaba 42 jong ka kylla step ba ka Nangkiew ka la ïoh ban pynphai noh ban pynïakhaid ïa ka jingïakhun lyngba u Isak Vanlalpeka.
Ka jingïakhun ha ka kylla miet ka la nang itynnad shuh shuh hadien ba u Wallamsuk Nongkhlaw u la ïoh ban lamkhmat kylla sa shi kol na ka bynta ka Nangkiew Irat ha ka minit kaba 66 bad pynbud sa kawei pat ka kol ha ka minit kaba 78.
Watla ka Langsning ka la ïakhun tyngeh hynrei tad haduh ban da kut ka por ïalehkai kam shym la lah satia ban pynïakhaid ïa ka jingïakhun bad pynlong ïa ka ban shah rem da 3-1 kol.
Kane ka jingjop ka la pynkut noh ruh ïa ka namrem kaba phra sien kynthih kaba phai dien biang naduh ka SPL 2023 ha kaba ka Nangkiew Irat ka la shah rem hynriew sien ban ban ha ka samoi ba la dep kynthup ïa ki ar tylli ki jingïakhun ba dang shu dep.
Shipor ka jinghap ban ïalehkai tang 10 ngut ha ki 20 minit shwa ban kut ka por ïalehkai ka la pynduh mynsiem bha ïa ka Nangkiew Irat hadien ba u Wanpynshngain Nongsteng u la ïoh ïa ka Yellow Card kaba ar ha katei ka janmiet.
Mynta ka sngi Balang pat ka jingïakhun ka long hapdeng ka Ryntih FC pyrshah ïa ka Rangdajied United FC ha ka por 5:30 baje janmiet.
