Wat hapdeng ka jingpyrshah, puk puk tei ka Sorkar ïa ka jaka khalai ha Ri Bhoi

Shillong, Nailar 23: Wat hapdeng ka jingpyrshah na jan baroh ki liang, hynrei ka jingtei ïa ka Casino ne ka jaka ïakhalai jong ka jylla ha Jorabad, Ri Bhoi District ka la nang ïaid beit shakhmat puk puk.
Kane ka Casino kan dei kaba nyngkong duh ha ka thaiñ Shatei lamihngi jong ka ri India bad kaban wanrah ruh ïa ka jylla Meghalaya ha ka map jong ka ki Jaka ïakhalai jong ka pyrthei.
Kane ka jingïakhalai kaba long da ka rukom ïakhalai jong ka juk kaba mynta ka long hadien ba ka sorkar MDA ka la wanrah ïa ka aiñ Meghalaya Regulation of Gambling Rules 2021 da kaba pyndam noh ïa ka Meghalaya Prevention of Gambling Act jong u snem 1970.
Ka jingtei ïa kane ka jaka ïakhalai ka la ïaid shaid shaid mynta ha Jorabad ha kaba la tei ïa ka Building kaba heh, kaba ka sorkar ka ong yn shah tang ban ïakhalai tang ki Nongshang pyrthei lane ki briew kiba wan shangkai pyrthei na shabar.
Kane ka jingkhih ban pynlong aiñ ïa ki kam ïakhalai ka long hadien ka jingïakynduh u Myntri ka tnad Khajna jong ka jylla, u James K. Sangma bad ki nongmihkhmat na ka UK India Business Council (UKIBC), ha kaba la lap ba ka Meghalaya kadei ka jylla kaba biang tam ban pynlong ïa ki kam ïakhalai.
Ka sorkar jylla ka khmih lynti ba kan ïoh lum shibun ka khajna na kane ka jaka ïakhalai.
Lah ban kdew hangne ba hadien ba la wanrah ïa kane ka aiñ la muh bun ka jingpyrshah na ka jylla. Kiba pyrshah ïa kane ka kam ïakhalai ki kynthup ki Seng jong ki Nongïalam Niam, ki Sengbhalang, ka Synjuk ki Nongsynshar Shnong na Ri Bhoi District bad kiwei kiwei.
Hynrei na ka liang ka Sorkar kam shym la sngap satia bad ka la ïa beit shakhmat ban pyntreikam beit ïa kane ka aiñ, da kaba pyntrei ïa kane ka jaka ïakhalai ne ka Casino ha Jorabad.