Wat hadien 3 snem ba shakri hapdeng u Covid-19 ym pat siew pisa ka Sorkar ïa ki nongñiah sumo

Nongpoh, Naiwieng 25: Ka seng Ri-Bhoi People’s Council, sengkmie ryngkat ki nongñiah sumo mynta ka sngi kila leit ban ïakynduh syndon ïa u Deputy Commissioner ka Ri-Bhoi District namar ka jingmynthi jong ka sorkar ban siew dep ïa ka pisa jong ki nongñiah sumo kiba la ai ka jingshakri bad miet bad sngi ha ka por ka jingïakhun ïa ka khlam Covid-19 wat hapdeng ka jingtieng jingsyier ïa katei ka jingpang.
Ka seng hapoh ka jingïalam u Samla Jayson Lennox Nongrum President ryngkat ki dkhot, ha ka jingdon lang ki nongñiah sumo kila pynkynmaw biang ïa u DC ban pynkloi noih ïa katei ka kam namar kane kam dei shuh ka sien ba nyngkong ba kum ki nongñiah kali kila pynsngew sha ka sorkar, hynrei mynta la 3 snem tam eiei ka sorkar kam pat lah ban siew dep ïa katei ka bainong ba kum ki nongñiah sumo kila ai ka jingshakri ïa ka sorkar.
U Bah Ekram Dkhar uwei na ki nongñiah sumo u la ïathuh ba la poi u pud ba ki trai sumo kila hap ban die noh wat ïa ka kali tang ban ïoh siew ïa ka bainong trei jong ki nongñiah kali namar ka jingpynslem jong ka sorkar ban siew ïa katei ka pisa kaba sah kumba 26 lakh eiei, namar ki nongñiah sumo ki im bad pyndap ïa ka iing ka sem da kaba kamai kali man ka sngi hynrei lada ka sorkar ka pynsah noh kan long ka jingeh kaba khraw ïa ki nongñiah kali wat ban siew dep ïa ka bai skul ki khun.
U Bah Jayson Lennox Nongrum President ka RBPC haba kren ha katei ka sngi u la ba kane ka dei ka kam kaba la sahteng mynta la kumba 3 snem eiei bad kum ka seng kala dep buh ruh da ka jingthoh 3 bnai mynshuwa sha u DC ban pynpaw ïa ka jingeh jong ki nongñiah kali ha ka por ka jingkhangdam ha kylleng ki ri ka pyrthei ban ïakhun ïa ka khlam Covid-19, ba kum ki nongñiah sumo wat hapdeng ka jingtieng kila mih shakhmat kum ki riew shlur ban shakri ryngkat bad ka sorkar ban ïakhun ïa katei ka khlam, hynrei kaba sngew lyngngoh ba haduh mynta ka sorkar kam pat lah ban siew ïa katei ka bainong.
U la ong ruh ka long kaba sngew thamula ha ka por ka khlam Covid-19 ka sorkar ka pynlut da ki spah klur, hynrei kam lah ban siew wat ïa ka 26 lakh kaba ki nongñiah kali ki dei hok ban ïoh halor ka jingshakri jong ki, hynrei ka sorkar ka bunkam ban pynlut ha ki tamasa bapher bapher kiba khlem don jingmih.
Na ka liang ki nongñiah kila ai por 15 sngi ïa ka sorkar ba ka dei ban siew dep ïa katei ka pisa bad lada kam lah na ka liang ki nongñiah kila pynkhreh da ka jingïakhih pyrshah ïa ka sorkar ban pynbor ba ka dei ban siew dep ïa katei ka pisa kaba ki dei hok ban ïoh ha ka por ba ïakhun ïa ka khlam Covid-19.