Kano kano ka rai kaba mih na ka jingtohkit, u VC ym dei shuh ban dang wan phai sha NEHU : NEHUSU

Shillong, Naiwieng, 25: Ki samla pule bad ki nonghikai jong ka skulbah North Eastern Hill University (NEHU) ha ka Lah Sngi u Blei ki la ïakynduh markhmat bad ki arngut ki dkhot jong ka komiti tohkit ba la thung da ka Ministry of Education bad ki la phah ruh ïa u kyrwoh uba shah ba kano kano ka rai kaba mih na ka jingtohkit, u Vice Chancellor ba mynta u Prof Prabha S. Shukla um dei shuh ban dang wan phai sha ka skulbah NEHU.
Ki samla pule kiba don hapoh ka lama jong ka North Eastern Hill University Students’ Union (NEHUSU) bad ka Khasi Students’ Union (KSU-NEHU Unit) lem bad ki nonghikai kiba don hapoh ka shatri jong ka North Eastern Hill University Teachers’ Association (NEHUTA) bad kiwei kiwei ki kynhun ki la aiti ïa ki jingujor sha sha ki arngut ki dkhot ka komiti, kaba tohkit ïa ki jingkynnoh pyrshah ïa u Vice Chancellor halor ka jingdkoh bad ki jingbymlah ban pynïaid kam hapoh ka skulbah.
Haba kren sha ki lad pathai khubor, u President jong ka NEHUSU u samla Sandy Sohtun u la ong, “ngi la ïasyllok bad aiti ruh ïa ki jingujor halor kaei kaba u Vice Chancellor u la leh la palat lai snem bad wat ïa ki dorkhas ba ngi ladep thoh naduh u 2022 haduh u snem 2024 ruh ngi la aiti ha ki. Ngi la pyni ruh ïa ki kot ki sla ïa kiba u Vice Chancellor u la buhrieh baroh shikatta ha kane ka skulbah.”
“Ngi la phah ïa u khubor uba shai ba watla ka jingmih na kane ka komiti kan long kumno kumno ruh, ngin ym ailad ïa u Vice Chancellor ban rung ha kane ka skulbah sa shisien pat,” u la pynpaw.
Da kaba pynpaw ïa ka jingshaniah ba ka komiti kan ai jingmut kaba biang bha pyrshah ïa u Vice Chancellor, u samla Sandy u la ong, “ngi sngewhun (ïa ka jingïalang) bad ngi la wanrah ïa ki kot ki sla kiba pyni ba u Vice Chancellor u la leh donbor bad buhrieh na ki kynhun bapher bapher jong ka skulbah.”
Une u nongïalam ki samla pule u la pyntip ba kim pat ïakren satia ïa ki sienjam ban shim nangne shakhmat bad ïa ka rai shen kin sa shim ha ka jingïalang ka ban sa long hapdeng ka NEHUSU bad ka KSU NEHU Unit.
“Ïa mynta, ka jingïakhih ka dang bteng ha kaba ym pat shym la lah ban pynsdang ïa ki jingshim klas.” u la ong.
Ki samla pule ki la pynsangeh shipor ïa ka jingïakhih shah thngan ba khlem pud sngi hadien ba bun na ki samla pule ki la shitom jur.
Haba pynpaw ba ka jingïalang ka long kaba seisoh, u President jong ka NEHUTA u Prof Lakhon Kma u la ong, “ngi la kren ïa kaei kaba ngi don ban kren. Ym don eiei ban buhrieh. Ïa kino kino ki mat kiba ngi la pynpaw haduh mynta na ka NEHUTA bad ki mat kiba la pynpaw da ki samla pule, ngi la pynpaw ha ka kynhun tohkit ba kano kano ka jingleh bakla kaba u (Vice Chancellor) u la leh ha kane ka skulbah naduh ka sngi ba u wan la ka dei ha ka jingpynrung kam, la ka long ka kam ban kyntait ïa ka hok jong kiba dei ban long Dean baroh kaba la lam sha kane ka khyllipmat ha kaba ngi baroh ngi dawa ban weng noh ïa u. Nga ladep pynpaw bad nga ngeit ba ka seng ka la kren shai ba lada mih kano kano ka rai na ka jingtohkit ka jingwan phai jong u (Vice Chancellor) hangne ka long kaba ngim lah shuh ban ïada bad ban pdiang ym ka NEHUTA, NEHUNSA ne ka NEHUSU ka la pynbna ïa u kum u briew ba la kyntait, hynrei wat ka Mawlai Town Dorbar ruh kaba dei ka kynhun jong ki khlieh nongsynshar shnong hapoh ka Khyrnit Bahynriew ka ladep pynbna ïa u kum u briew ba la kyntait, kaba mut um lah shuh ban dang wan iuhkjat hapoh ka jylli jong ka shnong Mawlai Ïa kane ruh ngi la pynsngew hakhmat ka kynhun tohkit.”
“Lada ngi peit bniah na baroh ki liang, ngi sngewhun ba ngi lah ban jam sha shiliang ïa kaei kaei kaba ngi kwah ban pynpaw halor ka jingbym lah treikam jong u, ka jingbym sngewtynnad ïa ki kam jong ka NEHU bad kumno u la ïalam ïa ka skulbah sha nala ne ka thliew ba jylliew,” u la bynrap.
“Lehse kan shim por sa 10 snem eiei bad mynta ngi ieh ha ka komiti tohkit kumno kin pynkhreh ïa ka kaiphod hynrei ngi la kren shai ba watla ka long kumno kumno iuh ka jingwanphai bïang jong u ka long kaba ym lah shuh ban pdiang ha skulbah NEHU bad ha ka jylla Meghalaya baroh kawei,” u la ong shuh shuh.