Nongpoh, Jymmang, 06: Kum ka jingmaham lypa ban lait na kino kino ki jingjia ba sngewsih bad ban nym shah ktah ki paidbah da ka jingmlien ban bam ïa ki Tit khlaw ba long bih, ka tnad Pulit na Ri Bhoi District ka la kyrpad lypa ïa ki paidbah ba kim dei satia ban bam klumar ïa ki Tit khlaw.
Kane ka jingbuh jingkyrpad ka tnad Pulit na Ri Bhoi ban mana halor ka jingbam klumar ïa ki tit khlaw, ka dei hadien ba la don ha kiwei kiwei ki District kiba la shah ktah na ka jingbam ïa ki Tit khlaw kiba long bih.
Kum ban pynkynmaw, ha ki snem ba la leit noh la sakhi bad la don ruh ki mynsiem kiba kordor kiba la duh noh ïa la ka jingim, kiba kynthup naduh ki khynnah bad kiba la heh la san, kaba dei tang na ka daw ka jingleit bam klumar ïa ki Tit ba long bih, kaba ki shu leit kheit klumar na ki khlaw ki btap ha kum kane ka aiom ba ki Tit khlaw ki la mih ha ki khlaw.
Ka Tnad Pulit na Ri Bhoi ka la pyntip paidbah ruh ba ki tit kiba long bih lada bam kan wan rah ka jingdap lyer ka kpoh kaba ïalam pat sha ka jingsam prie, prie bad pynhiar, kiba long kita ki dak ki shin kiba ktah na ka jingbih ïa ki Tit ba long bih.
Ka tnat tnad Pulit lyngba u Superintendent of Police ka Ri Bhoi, u V.S Rathore ha ka kyrwoh khubor ba la pynlait paidbah, u la kyrpad jur ïa ki paidbah ba kin ai ka jingïatrei lang bad khamtam lada don kino kino ki dak ki shin kiba lah ban ktah na ka jingbam ïa ki Tit khlaw ki dei ban leit mardor sha ki PHC, CHC bad kiwei ki jaka ai jingsumar khnang ban ïoh ban sumar ha ka por kaba biang.
