Soi soskular ka sorkar jylla bad ka BAKDIL ban kyntiew ïa ka bha ka miat ki khyllung

Shillong, Jymmang 06: Kum shi bynta na ka jingsdang ban pynkhlaiñ ïa ka community-led early childhood development (ECD), ka sorkar jylla ka la soi ïa ka soskular Memorandum of Understanding (MoU) bad ka BAKDIL, ka shnat social service wing jong ka Catholic Diocese kaba ha Tura. Ïa kane ka MoU la soi ha ka jingdonlang u Myntri Rangbah ka jylla u Conrad K. Sangma ha ka prokram plie ïa ka ECD kaba la long ha St. Luke’s Church, Tura ha ka sngi baar.
Ïa kane ka jingmynjur la ïakut ba kan don ka jingïatreilang kaba ar snem haba ki Parish Priest, ki Catechist, Pocharok, bad ki Touring Sister kin trei ryngkat bad ka Meghalaya Early Childhood Development Mission (MECDM) ban ïarap sumar ïa ki khyllung, nangta ka jingkoit jingkhiah ki kmie bad kiwei pat ki jingtip ha ki 5 tylli ki district jong ka Garo Hills- East Garo Hills, West Garo Hills, South Garo Hills, North Garo Hills bad South West Garo Hills.
Ïa kane ka MoU la soi da u Sampath Kumar, Principal Secretary & Development Commissioner, bad u Rt. Rev. Andrew R. Marak, Bishop ka Tura Diocese. U Bah Ronald Kynta, Chief Operations Officer, MECDM, bad u Fr. Cyril Sangma, Director ka BAKDIL, nalor kiwei pat kiba la ïadonlang.
La ong ba kane ka programme ka pynpaw ruh ïa ka jinglong kaba kyrpang ha kaba ïadei bad ka jingngeit kaba la pynshong dor ruh haba ïadei bad ka roi ka san jong ki khyllung. Kane ka jingïatreilang jong ka MECDM bad ka BAKDIL kan pynïasoh ïa ki jingthmu jong ka ECD bad kiwei pat ki jingthmu.
Ha kane ka prokram la wan ban ïashim bynta da kumba 100 ngut ki briew ba kynthup ruh ïa ki Parish Priest, Touring Sister, ki nongmihkhmat SHG ba la pynïaid da ka BAKDIL, ki heh ophisar kum u Vibhor Agarwal, IAS, Deputy Commissioner, West Garo Hills, ka Rikse R. Marak, MCS, Joint Secretary, CM’s Secretariat Tura, bad u Abraham T Sangma, IPS, SP West Garo Hills.
Haba kren ha kane ka sngi, u Myntri Rangbah ka jylla u Conrad K. Sangma, u la pynpaw ïa ka jingdonkam ban buh ïa ka ECD na ka bynta ka jingtei jong ka hok longbriew manbriew.
U Myntri Rangbah u la pynpaw ruh ïa ki jingtreikam jong ka jylla ha kaba ïadei bad ka koit ka khiah ki longkmie kum ka MOTHER dashboard bad MMDSL.
Haba kren pdiang u Fr. Cyril Sangma, Director, BAKDIL, u la ong ba ka jingthmu jong kane ka prokram ka long ban ïarap ïa ki khynnah ba kin sngewthuh ïa ki lad jingmyntoi ba ki dei ban ïoh. Ka Balang ka long kaba kloi ban ai ki jingkyrshan bad kane ka prokram ruh kan ym long kaba jop lada ym don ka jingïatreilang.
Katba na ka liang u Rt. Rev. Andrew R. Marak, Bishop ka Tura Diocese, u la banjur halor ka jingdonkam ban ïatreilang na ka bynta ka bha ka miat ki nongshong shnong.
La ong ba kane ka jingïatreilang bad ka BAKDIL ki prokram ki la long kiba jop ha u snem ba la dep lyngba ka jingïatreilang bad ka A’chik Baptist Dal’gipa Krima (ABDK), ha kaba palat 200 ngut ki longkmie nongïalam balang ki la ïoh ka jingshah hikai halor ka ECD, ha kaba la pynlong ïa ka Meghalaya na kiwei pat ki jylla kiba pyndon bynta lang ïa ki Balang na ka bynta ban kyntiew ïa ka bha ka miat ki khynnah khyllung.