Shillong Lber 31: Ka Hynñiewtrep Integrated Territorial Organisation hynne ka sngi ka la phah da ka dorkhas sha u Deputy Commissioner ka East Khasi Hills, ba um dei ban ai jingbit ïa ka MLMDF ba kan pynlong ïa ka jingïakhih da kaba ïashong kyllaiñ myngor ha nongbah Shillong.
U President ka HITO Bah Donbok Dkhar ha ka kyrwoh khubor ula pynpaw ba ka seng ka pyrshah jur ban ai jingbit ïa ka MLMDF hapoh ka jingïalam u SK Choudhary, ban pynlong ïa ka jingïashong kyllaiñ myngor halor ka jingshah pynïap jong ki arngut ki bar jylla ha Ichamati, Shella.
“Watla ka dei ka hok jong ki paidbah ban pynlong ïa ka jingïakhih, hynrei ban pynlong ïa ka jingïakhih kaba jai jai ha kum kane ka por ka lah ban nang ai ding bad kan pynmih ïa ka jingsngew ïapher jaitbynriew ha ka jaka ka jong ngi,” ula ong.
“Ngi kyntu ïa ki jaitbynriew ki bym dei Khasi ba ki dei ban sngewnguh ïa ka jingshisha ba ki paid Khasi kila ïai bteng ban ïakhun na ka bynta ka hok ka jongki mynta la palat 76 snem (1948-2024) ha kaba kila mad ïa ka jingeh na ka jingshah knieh ïa ka khaïi pateng bad ka kam saiñ hima sima ha ki briew kiba nabar bad na ka jingbym pynurlong ïa ka jingkular ka ri ïa ka jingïatehkular ha kaba ïadei bad ka Annexed Agreement hapoh jong ka jingbuh ïa ki kyndon jong ka Instrument of Accession kaba la ïasoi bad mynjur da ka sorkar India bad ki paid Khasi mynta la 76 snem,” ong u Bah Dkhar.
Ula ong, ba ka National Commission for Schedule Tribes (NCST) ha u ïaïong 2012 ka la phah ïa ka jingbthah ïa ka Ministry of Home Affairs bad Ministry of Tribal Affairs jong ka Sorkar India ban pynrung ïa ki kyndon jong ka Annexed Agreement ha ka riti synshar ka ri hynrei haduh mynta la kyntait ban leh ïa katei da ka sorkar pdeng bad sorkar jylla bad kila pynlong kamkai ïa ka Article 338A jong ka riti synshar ka ri India.
Ka jingbym pyndep ïa katei ka jingïatehkular ka la wanrah ïa ka jingbym shngaiñ ïa ki paid riewlum Khasi bad kumta ki ïai bteng ban pynlong ïa ki jingïakhih bad ban bteng ban ïakhun ha ka lynti jong ka ri synshar paidbah.
“Ka HITO kam pyrshah ïa ka MLMDF ban pynlong ïa ka jingïakhih bad kadei ka hok lyngba ka riti synshar ka ri ban pynlong ïa ka jingïakhih kaba jai jai halor kano kano ka mat, hynrei lada ailad ba ka MLMDF ban pynlong ïa katei ka jingïakhih, ngi ki HITO ngi kwah ban pan jingbit lang ban ïalum ban pynlong ïa ka jingïakhih kaba jai jai ban dawa ïa ka hok halor ka jingshah pynïap u (L) Lurshai Hynñiewta ha katei kajuh ka sngi bad ka juh hi ka jaka kaba pynlong da ka MLMDF ha Shella, Sohra ne Shillong,” la ong u Bah Donbok Dkhar.
Ka HITO ka pyrshah jur bad pynrem jur ïa ka jingkynnoh ka CWC pyrshah ïa ka KSU, katba ki pulit kim pat ïoh ïa ki sakhi ne sabut ka long kaba kloi eh ban kynnoh ba ki riewlum kila leh ïa katei ka kam thombor kiba la jia ha kylleng ka jylla pyrshah ïa ki jaitbynriew Bengali, ym lah ban tip ba ka lah ban dei ruh ka kam kaba la leh da kiwei pat ban pynjah burom ïa ka jaitbynriew Khasi, Jaiñtia bad ki Garo.
