Shillong, Nailur 22: Hynne ka sngi Thohdieng ki la don ar ngut ki nongïakop mareh thong kiba ju shimbynta ha ki International level napoh Kenya, ki la wanpoi ha nongbah Shillong ban shimbynta ha ka tamasa jong ka 2nd Sohra International Half Marathon Run ka ban sa long shen.
Kine ki arngut ki kynthup ïa u Elijah kipruto kemei bad ka Agnes mueni mutua.
Haba phai sha u Elijah kipruto kemei, 35 snem, bad ka por kaba stet ka jong u ban pyndep ïa ka 21k marathon ka long 1 kynta 5min, u la shimbynta ha kiba bun ki tamasa ïakop mareh kynthup ïa ka lympung ha Mumbai 2018, China 2019, Sohra International Half Marathon 2022, Udaipur 2023 bad Gujarat 2023.
Katba ka Agnes mueni mutua, 36 snem, ka por kaba stet jong ka ban pyndep pura ïa ka 21k marathon ka long 1 kynta 14 minit, ka la shimbynta ruh dang shen ha ka Tanzania 2022, Rwanda 2023 bad kane ka dei ka sien kaba nyngkong ha India.
Baroh arngut ki la wanpoi ha ophis treikam jong ka MSOA ha ka nohphaisngi jong ka 22 tarik, Nailur, 2023 ban leit kynduh ïa u Bah Finely L Pariat (Organising Secretary) ryngkat ïa u Bah John F Kharshiing Co-Chairman jong ka 2nd Sohra International Half Marathon 2023.
Na ka liang jong ki, ki la pynpaw ïa ka jingsngewkmen ban ban wan ïuhkjat ha Meghalaya, bad ki la pynpaw ba ki la wan kham kloi khnang ban sngewthuh ïa ka jinglong ka mariang ha kane ka jylla.
