Nongpoh, Kyllalyngkot 31: Kum uwei na u samla uba ju pyndonkam ïa ka sap ka phong ha ka kam ïalehkai Kyokushin Karate na Ri Bhoi District bad ka long pat ka burom ba hapdeng ka jingangnud jong u ban kiew ha kane ka kam ïalehkai bad u la lah ban wan burom na kawei ka lympung ïakhun kaba long ha Nongbah Kolkata.
Kane ka lympung kab utei u samla u la leit ban aireng ka dei ka All India 2nd Oyama Cup kaba la long ha ka 28 bad 29 tarik u Kyllalyngkot 2023 bad na kane ka lympung ha ka jingkhia kaba 65 KG u la ioh rah ïa ka nam lahduh kum u lahduh na katei ka lympung ïakhun Kyokushin Karate.
Une u samla u dei u samla Francis Makri na ka shnong Umngei ha Ri Bhoi District bad u la don ha ka rta kaba 19 snem bad kum u samla u la ju pynlut por ïa lade h akane ka kam ïalehkai wat lada u dei na u samla uba wan na ka longïing baduk ba kyrduh kaba u hap ban mad shibun ki jingeh jingtynjuh ha ka jingïaid lynti jong u ban kiew shaphrang ha kane ka kam ïalehkai sport ba la tip kum ka Kyokushin Karate.
Ia une u samla la pdiang burom mynta ka sngi hadien ba la wan phai na nongbah Kolkata kaba dei ruh hadien ba u la ioh ban khur ïa ka nam jop kum u lahduh ha ka jingkhia kaba 65 KG na katei ka All India Oyama Cup kaba la pynkut noh ha Nongbah Kolkata.
Na ka liang ka Meghalaya Kyokushin Karate Association ryngkat ki dkhot bad kiba haïing hasem mynta ka sngi ki la pdiang burom ruh ïa une u samla hadien ba u la wan poi ha Nongpoh bad kum ka jingkmen bad ka jingburom halor katei ka nam bad ka burom kaba u la wan rah na katei ka lympung ha Kolkata ki la ai burom ruh da ki jaid bad ki syntiew ban dang pynshlur shuh shuh ïa une u samla ba un pyndonkam hok ïa ka sap kaba u don ha katei ka kam ïalehkai Kyokushin Karate.
Na ka liang u Bah Berin Klein kum u President ka Meghalaya Kyokushin Karate Association ryngkat u Bah Kores Marwein kum ki nongïalam kiba ju kyntiew ïa ki khun samla ha ka kam ïalehkai Kyokushin Karate bad ka MMA, ki la ai khublei kyrpang ïa u Samla Francis Makri halor kane ka jingwan rah nam rah burom sha ka jylla na katei ka lympung kaba u la wan ban aireng ha Nongbah Kolkta.
Kum ki nongïalam kiba ieit ïa ka kam ïalehkai sport, u Bah Berin Kleiñ bad u Bah Kores Marwein, ki la kyntu ruh ïa ki khun samla ka District bad ka jylla ba kin dang dei ban shlur ha kano kano ka sap kaba ki don kam pher la ka dei na kano kano ka jaid jingïalehkai sport bad ka thong hi ka long ba kin long briew man briew bad ba kin ioh kata kajingmyntoi na kata ka sap kyrpang ba la ai da u Blei bad ym ban pyndonkam bakla ïa ka sap ba la ai kyrpang da u Blei.
Na ka liang u Samla Francis Makri ruh hadien ba la rah ïa katei ka nam jop na Kolkata, u la pynpaw ka jingkmen ba hapdeng shibun ki jingeh kiba u hap ban mad halor ka jingangnud ban kiew ïa katei ka kam ïalehkai sport, hynrei da ka jingdon kti lang ki nongïalam kiba ju kyrshan ïa u, u la lah ban poi sha kane ka thong kaba u angnud ban kiew ha ka kam ïalehkai Kyokushin Karate.
Shuh shuh, u la pynpaw ruh kino ki samla kiba don sap wat la ki thrang ban poi sha kata ka thong kaba ki angnud bad haba ban pat ka jingduk ki ïa kynduh shibun ki jingeh bad lada don pat kito ki riew kylluid mynsiem ka long ka jingai mynsiem ha kaba wat ka sorkar jylla ruh ka hap ban phai khmat kyrpang sha ki khun samla don sap ka jylla khnang ba kum ki samla kin nym don hapdeng ka jingduh jingkyrmen ha kum kane ka pyrthei kyrduh kam kyrduh jam, u la bynrap.
